Gobierno lo purba ‘acelera’ cierto proceso di SCP

ORANJESTAD – Pa e mandatario di asuntonan social Glenbert Croes, e sucesonan di ultimo fin di siman, tabata mas cu suficiente pa haci un autorefleccion cu si berdaderamente tur locual cu Gobierno y SCP a bin ta haciendo, ta suficiente. Tin trabounan intenso tumando luga. Pero segun e mandatario, ta bon pa para keto un rato pa haci e evaluacion di kico tur e señalnan aki ta mustrando nos, cu si tur locual cu a bin ta haciendo ta realmente ta esfuerso suficiente pa atende cu e problemanan aki. 

ACELERA

Un decision cu a surgi di e reunion urgente yama pa e mandatario ta, cu ta bay evalua e sincronisacion di SCP conhuntamente cu Unicef pa evalua si tin procesonan cu por acelera of cu mester di ‘finetuning’ pa haci e proceso mas skerpi pa no faya ningun detaye. Esaki ta e decision pa encamina awor y cu Dios mediante e lo resulta den un Aruba sana di su problemanan social, un Aruba cu mentalidad completamente transforma unda cu abuso sexual di mucha o adulto ta intolerabel, un cambio di  mentalidad unda abuso fisico di cualkier ser humano ta inaceptabel, un Pais cu sano huicio. Na e Aruba ey Minister Glenbert Croes kier yega. Y e tin e fe y confiansa cu e SCP lo desemboca den e Aruba aki.