DVG: Alerta si bo a bay show riba Freewinds, pa malesa sarampi

ORANJESTAD -  Manera cu ja ta conoci for di noticianan international, e conocido bapor Free Winds cu ta regularmente na Aruba, despues cu un tripulante a wordo diagnostica cu Sarampi (Measles).

Na momento cu e prome sintomanan a aparece cerca e tripulante, medidanan di precaucion a wordo tuma pa evita cu mas hende porwordo contagia cu e malesa aki riba e barco dor di pone e tripulante aki den isolacion riba 22 di April  ultimo. E barco aki a wordo buta bou di quarentena te cu 21 di Mei 2019 y ningun pasahero di e barco no por bandona e barco na ningun puerto(waf) te cu e fecha menciona.

Riba 27 april 2019 tabata tin un concierto riba e barco aki caminda algun persona di Aruba a atende. Pa cu esaki, nos di Departamento di Salud Publico, ta informa na e personanan cu a atende concierto fecha 27 di April riba Free Winds pa si acasonan hanja rash, keintura, tosamento y wowo ta pika, bira cora y basha awa prome 21 di mei 2019, por fabor tuma contacto mesora cu e enfermeronan di nos Seccion di Malesanan Contagioso na 5224-224/237/236 of telefonicamente cu bo docter di cas y no acudi na eerste hulp ni na bo docter di cas pa motibo cu bo lo por contagia otro hende. Aunke e chens ta minimo cu nos localnan cu a atende e concierto ultimo por a keda infecta, toch nos pidi, pa si tin algun hende cu ta sinti e sintomanan mentiona, tuma contacto mesora cu e departamento. Actualmente rond di mundo tin brotenan di Sarampi ta lantando cabez y ta un riesgo serio pa salud publico en general. 

E poblacion di Aruba ta mas cu 95% vacuna contra Sarampi y esey ta pone cu riesgo pa nos haya e malesa aki ta mas abou. Tambe ta pone nos comunidad na un grado di proteccion halto segun reglanan di World Health Organization (WHO). 

Pa mantene e grado di vacuna di Aruba halto, Salud Publico ta conseha tur mayornan pa corda vacuna nan yiunan segun e schedule di Jeugd Gezondheidszorg y Wit Gele Kruis.