No tin necesidad pa negosha reapertura di frontera cu Venezuela

ORANJESTAD – No tin necesidad awor pa negosha un reapertura di frontera entre Venezuela y islanan ABC. Asina minister Hulandes di Relacionan Exterior Stef Blok a bisa NoticiaCla diahuebs mainta durante un conferencia di prensa. E ta admiti cu aña pasa e situacion tabata diferente y un necesidad urgente pa kita e blokeo di frontera, pa motibonan economico etc. E situacion un aña despues ta diferente. Y como tal Blok no ta wak e necesario awor. 

AÑA PASA

Segun Blok, aña pasa ora cu e presidente Venezolano Nicolas Maduro a cera e frontera pa prome biaha, e situacion a gara Aruba di sorpresa, creando un problema economico serio. Blok a referi na e importacion di fruta, turismo limita, y e problema di expulsa illegalnan di e pais. Como tal, e tempo ey e tabata den region y a opta pa bula bay Venezuela y negosha un fin na e blokeo. E biaha aki e situacion ta diferente segun Blok. “Proveedornan di mercancia a haya alternativa. E necesidad urgente pa habri e frontera no tey mas” Blok a bisa. “Ademas, e situacion na Venezuela ta hopi tenso aworaki. Mi no ta bay Venezuela awor!” Blok a bisa, den sentido cu e situacion ta peligroso pa e mes bay eynan aworaki. Como tal, e no ta wak necesidad pa bay bolbe negosha un reapertura.