Situacion financiero di Aruba den discusion na Hulanda y Aruba awe

DEN HAAG – Aruba su situacion financiero ta wordo atendi diahuebs tanto na Hulanda como Aruba. E prome reunion ta tuma lugar diahuebs mainta tempran (ora di Aruba) entre Aruba y Hulanda, den un conferencia di video, entre representantenan di gobierno Hulandes cu e.o. Richard van Zwol, y for di Aruba e.o. minister di finanza Angel Bermudez. Durante e reunion aki, NoticiaCla.com a compronde cu lo trata e proximo agenda di Conseho di Minister di Reino di 14 di november, unda cu Aruba lo forma un parti crucial. NoticiaCla.com a compronde cu algun decision crucial lo por cay pa Aruba den cuadro di su situacion financiero.

E di dos reunion ta tuma lugar merdia (ora di Hulanda) den Tweede Kamer den un reunion di comision fiho (vaste commissie ) di asuntonan di Reino, esun di asuntonan Interno, y esun di Finanzas. E reunion ta trata tur asunto financiero di e paisnan den Reino, y ta cuminsa cu esun di Aruba. E reunionnan aki di diahuebs merdia, ta wordo atendi pa minister encarga Ronald Plasterk. Aki lo trata e.o. tres tema: ‘Tussenrapport onderzoek financiële positie Aruba’, ‘Stand van zaken overheidsfinanciën Aruba’ y ‘Reactie op het eindrapport van het College Financieel Toezicht (Cft) overheidsfinanciën Aruba’. (wak e agenda completo aki).

Despues di e reunion aki, NoticiaCla.com lo por tin mas informacion di e resultado di ambos, y kico esaki ta nifica pa Aruba. informacion cu NoticiaCla.com tin mientrastanto, ta cu Hulanda lo atende Aruba cu mester tuma mas medida, y cu si no logra convence Aruba di esaki, ta spera Aruba medidanan adicional cu lo por wordo presenta na dje durante e proximo reunion di conseho di minister di Reino.