DIMAS cu intake di peticion di estadia temporario na Enseñansa pa Empleo

ORANJESTAD -  Pa motibonan conoci, DIMAS no ta ubica temporalmente den su edificio nobo na Paardenbaaistraat. Considerando e cantidad di citanan confirma pa un entrega di un peticion pa un permiso di estadia temporal, a busca pa haya un localidad temporario unda por haci intake manual.

Ensenansa pa Empleo a brinda DIMAS 2 espacio grandi (leslokalen) pa e meta aki. Desde 29 di oktober 2014 te cu 5 di november 2014 DIMAS su oficina na Paardenbaai tawata sera pa motibo di un situacion pafor di nan alcanse. Tur intake ta tumando lugar manualmente na Engelandstraat pa motibo cu no tin aceso na systema di registracion.

Hopi mes tawata es clientenan cu a acudi – segun e schema publica den medionan di comunicacion - y cu a logra di a entrega nan peticion pa un permiso di estadia, sea cu ta promer peticion of ta un extension.

DIMAS ta duna ainda un ultimo chance na esnan cu – pa cualkier motibo – no por a bin DIMAS su oficina temporal na Engelandstraat (na banda na e edificio di Ensenansa pa Empleo), pa entrega nan peticion segun e schema publica na nan orario di cita.

Clientenan por acudi na mesun orario di nan cita original – pues di e dianan cu nos edificio tawata for di operacion – riba fechanan 6 of 7 di november 2014 y tambe esnan cu cita normal pa e dia ey na Ensenansa pa Empleo.

Despues di e fechanan aki (6 y 7 di nov 2014) e clientenan cu a keda sin bin pa entrega of a bin pero no tawata tin nan peticion completo, mester percura pa nan traha nan cita nobo via e website di DIMAS, cu ta www.dimasaruba.com.

DIMAS ta pidi disculpa pa tur inconveniencia cu e situacion temporal di su edificio por a ocasiona pa su servicio y su operations. DIMAS ta spera di pronto por bolbe back su edificio na Paardenbaaistraat pa reanuda tur trabounan pendiente y tambe pa brinda tur servicio optimalmente. Mas informacion ta sigui asina cu tin fecha concreto.