Situacion di coriente a cuminsa normalisa atrobe na Aruba

ORANJESTAD – Despues cu coriente a bay inicialmente parti di Aruba pa 5:20pm diadomingo atardi, esaki a bira pio rond di cuarto pasa di 7, anochi cu un blackout total. Pero ya pa 8:16, cos a cuminsa normalisa. Segun vocero di WEB Asja Dongen, a cuminsa suministra Elmar cu coriente bek, y e prome areanan pa haya coriente, ta Hospital y Aeropuerto. Poco poco esaki lo keda suministra te ora tur districto y bario haya coriente atrobe. Loke ta un hecho ta cu tecniconan di WEB tabata traha duro pa resolve e problema cu a surgi for di atardi laat. E problema a cuminsa pa 5:20pm ora cu director di WEB Luis Oduber a confirma cu tabatin un storing cu a pone cu parti di e planta a bay down. A papia inicialmente di un brown out, esta parti di Aruba so, pero esaki despues a bira un blackout total ora cu e planta full a bay abou.