E aña aki Aruba tin cantidad record di Condecoracion Real

ORANJESTAD – E aña aki e ceremonia di condecoracion real ta hayando mas atencion debi na e cantidad di condecorado. Diabierna, un dia prome cu Dia di Rey, Gobernador di Aruba, Su Excelencia Alfonso Boekhoudt tin un lista di no menos cu 35 condecorado, di cual 11 ta bira ‘Ridder in de Orde van Oranje-Nassau’, y 24 ta bira ‘Lid in de Orde van Oranje-Nassau’. E nombernan ta bira conoci diabierna, pero e portal aki a compronde cu no tur lo ta presente diabierna, debi na biahe of otro motibo, y lo haya e condecoracion despues. 

MOTIBO

Debi na e esfuerso extra di e commission di nominacion, a logra haya mas persona pa haya e condecoracion, y a haci esaki di tal forma pa guia e proceso di tal forma cu e grupo por bira y keda grandi. Esnan condecora tin un historia hopi varia, manera trabou parokial, humanitario, conservacion di naturalesa, scouting, promocion di arte, actividad social, actividad deportivo y tambe trabou filantropico. 

EVENTO

E evento lo tuma lugar diabierna mainta den Renaissance Conference Center y lo keda documenta pa prensa en general. Despues anochi, lo sigui e acostumbrado recepcion ‘oranjo’, na honor di Su Mahestad Rey Willem Alexander cu ta celebra su cumpleaños un dia despues, unda cu e 35 condecoradonan (esnan cu ta presente y ricibi esaki e mainta prome) lo ta e invitadonan di honor.

AÑA PASA

Aña pasa tabatin un total di 2908 persona cu a haya condecoracion den Reino Hulandes. Pa Orde van de Nederlandse Leeuw tabatin 18 persona condecora, mientras cu pa Orde van Oranje-Nassau 2.890 persona. Den Caribe Hulandes un total di 23 persona a ricibi condecoracion. Fuera di Aruba cu aña pasa a haya 8, na Corsou 11 persona a keda condecora y na Bonaire 4. E aña aki pa Aruba, tin 35.