Croes: Congreso DTSL lo no ta manera Dialogo Social

ORANJESTAD – E prome Congreso Dialogo Tripartit Social Laboral cu ta tuma lugar dialuna awor, no ta mescos cu e conocido Dialogo Social manera cu gobierno anterior tabata organisa. Asina minister di Labor Glenbert Croes a sigura NoticiaCla diahuebs durante e rueda di prensa di gobierno bisemanal.  Segun Croes   "E ta nos deber nacional pa garantisa siguridad y salud di tur trahado implementando e Ley di ARBO". E ley aki ta canando su camindanan di consulta y conseho pa finalmente yega Parlamento di Aruba. Ademas di salud y siguridad, e ley aki lo ta un arma balioso cu lo crea mas cupo di trabou specialmente pa nos mediconan gradua den region cu no por eherce nan profesion aki na Aruba”.

PARTICIPANTENAN

Mientras cu durante e conferencia, dos sindicato y un gremio commercial a presenta tambe, e mandatario a sigura cu tur gremio y sindicato ta invita. Pero durante e conferencia,  Omar Tromp representando Gremio Comercial,   Diego De Cuba y Hubert Dirksz representando Gremio Sindical a hiba palabra. Y segun nan,  por fin despues di casi 9 luna di preparacion e prome Congreso Nacional Tripartita Social Laboral ta bay tuma luga dialuna 29 di april.

TEMPO

E proceso a tuma su tempo pa motibo di e preparacionnan extenso pa por cumpli cu regla, norma y structura manera prescribi pa ILO esta International Labor Organization. Pa e congreso aki ta conta cu participacion di tur Gremio Comercial y Sindical. Pues un structura cu lo garantisa e balansa efectivo pa sigura exito di e prome congreso Tripartita Social Laboral. Manera Minister  Croes a expresa, ta su deseo pa esaki bira un plataforma permanente di dialogo unda cu den esfuersonan conhunto por determina e futuro di nos Pais cu ta carga sosten di tur partner. 

E dia di Congreso ta reparti como lo siguiente: parti mainta lo trata reglanan di Dialogo Tripartit Social Laboral esta D.T.S.L.  como tambe e proyecto di ley ARBO. Merdia lo trata Plan di Trabao di D.T.S.L. pa 2019 segun prioridadnan y puntonan al caso. Minister  Croes un biaha mas ta invita tur Organizacion, Sindicato, Prensa, Instancianan pa ta presente y participa sea activamente of como observador, pa hunto nos determina e curso di locual mester ta e futuro di nos Pais y nos Pueblo.