Joe Biden ta e di 20 candidato presidencial Mericano democrata pa 2020

WASHINGTON – Cu ex vice presidente Mericano Joe Biden postulando su mes como candidato presidencial Mericano (pa di tres biaha), awor oficialmente tin 20 candidato democrata cu ta postula, contra 2 candidato republicano, cu ta inclui e actual presidente Donald Trump. Biden tabata e ultimo awe mainta cu a postula, y cu mesora a bira esun na cabez di e grupo di 20 democrata, primordialmente pa su experencia. Mesora Trump a desee exito pero den un forma sarcastico y a bise cu e ta spera cu Biden yega suficientemente leu pa por competi cu ne. 

ELECCION

E proximo eleccion presidencial Mericano ta poni pa tuma lugar e prome siman di November di 2020, unda cu Trump ta sigura cu e ta bolbe gana e eleccion. Trump tabata e sorpresa grandi ultimo eleccion, unda cu el a facilmente gana e lista di candidato prominente republican manera Marko Rubio, Jeb Bush y otro candidatonan di taya. Despues e eleccion a bira uno entre Trump y Hillary Clinton (ex prome dama di Merca y ex minister di relacionan exterior), cu finalmente Trump a gana. Trump por participa den un eleccion mas, y a sigura cu e no tin ningun problema pa gana e eleccion aki tambe.