Disputa entre ex minister Wever y actual minister Oduber a sigui

ORANJESTAD – E disputa entre ex minister Booshi Wever y actual minister Otmar Oduber riba tema di Dump, no a keda alivia cu e bishita di Wever diaranson pa wak documentonan solicita riba e tema di Dump. Despues cu e ex mandatario a cuestiona e proyecto, a pidi pa medio di un LOB (Landsbesluit Openbaarheid van Bestuur), pa por wak e documentonan. Oduber na su turno a concede esaki, pero di un forma ‘ter inzage’ esta cu e por wak e na e sitio, pero no por hiba copia di documento cas. E ex mandatario no obstante obhecion, a presenta. Na final, manera a spera, e ‘discusion’ no a termina. Uno ta acusa otro di a actua sea contra ley y of no a cumpli cu reglanan di gobernacion corecto. 

WEVER VS ODUBER 

E ex mandatario ta acusa e actual mandatario di no a actua corecto, y cu lo tin informacion cu cierto cosnan y proceso den e departamento di Serlimar y tambe e proyecto di dump, no a bay conforme regla. E alegacion a bira mas serio ora cu e siman aki el a condena e hecho cu ta bulldoze e proyecto di Boulden & Lawson, y ta considera esaki destruccion di capital. Oduber den un contra atake, a indica cu esaki no ta berdad y cu mas bien e proyecto cu tin cu procesa e ‘sludge’, ta perdemento di placa. Y un bishita e siman aki na e sitio, segun Oduber, a comproba nan inquietud. 

BISHITA

Contra su gusto, Wever a bishita e oficina di e actual mandatario y durante casi mas di 2 ora, a repasa e documentonan cu a wordo poni na su disposicion, pero conforme cu e no por a saca copia y hiba nan su cas. Riba pregunta di NoticiaCla, Oduber a clarifica cu e problema pa hiba documentonan cas, ta pasobra cierto di nan ta contene informacion priva di cierto instancia, cu no ta bon pa bay den publicidad. Ademas, segun Oduber, e proceso cu a usa, ta conforme margen di ley.