American Airlines a anuncia su di tres buelo diario pa Aruba

ORANJESTAD – American Airlines a anuncia su di tres buelo diario pa Aruba . Aruba Airport Authority N.V. (AAA) diaranson a comparti e noticia aki. American Airlines cu actualmente ta brinda 2 buelo diario pa y for di Miami, a anuncia un di 3 buelo diario cu lo wordo añadi den su schedule di buelo. Cuminsando diahuebs 6 di November 2014, American Airlines lo introduci e buelo diario aki pa Miami International Airport usando su avion B737-800 cu por acomoda 154 pasahero, di cual 16 por biaha den Business class y 138 den Economy class. Buelonan lo sali for di Aruba 10:28, 15:09 y 17:47 mientras cu buelonan for di Miami lo sali 10:05, 12:40 y 17.29. E buelo diario adicional aki ta traduci den un aumento di capacidad di minimo 4620 asiento pa luna.

Un factor hopi importante cu a tene cuenta cu ne ora a plania e di 3 buelo diario ta e abilidad pa pasaheronan por conecta cu varios buelo ora cu nan yega Miami. E orarionan di buelo brinda door di American Airlines ta brinda bon opcion pa conecta cu e resto di pais of otro destinacionnan internacional. “Nos ta hopi contento cu e noticia di e di 3 servicio diario door di American Airlines! E buelo aki ta duna nos pasaheronan local y internacional un opcion extra pa biaha entre Merca y Aruba” CEO di AAA NV, James Fazio a bisa.