Gobierno decepciona cu proceso pa trata sludge na Parkietenbos

ORANJESTAD – Gobierno a keda hopi decepciona den proceso pa trata sludge na dump di Parkietenbos. Asina minister di medio ambiente Otmar Oduber a bisa diaranson durante un conferencia di prensa. Segun e mandatario, e siman aki a habri cu bishita di DOW, Serlimar y diferente experto y profesionalnan pa analisa e situacion andando di e proceso di maneho di sludge. E sludge cu ta procedente di e rioolwaterzuiveringsinstallaties (RWZI) ta un substancia cu ta consisti di en averahe 80% di awa cu nivel halto di diferente tipo di bacteria, virus y parasitos. Gobierno di Aruba ta paga 1.3 miyon florin pa aña na e compania pa kima y seka e sludge y pa despues e wordo tira riba e landfill. A constata cu e sistema aki cu ya ta pagando p’e pa 7 aña no ta funciona manera debe ser! Esaki ta exactamente locual cu ya a wordo detecta a traves di un rapport na 2016.