Blok ta premira cu crisis di Venezuela ta dura un aña

DEN HAAG – E crisis na Venezuela ta resolvi dentro di un aña. Asina minister Hulandes di relacion exterior Stef Blok a contesta miembronan di Tweede Kamer e siman aki, riba e tema di e tratado entre Hulanda y Merca pa cu e facilidad humanitario na Corsou. E ayudo humanitario no por costa Reino Hulandes nada segun Blok. Ta solamente cu e condicion ey, e tratado por sigui, sin cu e tin cu pasa den Tweede Kamer. Mientras cu tur esaki tabata conoci, toch e commission di Relacionan Exterior no kier a tuma esaki sin mas y a manda un serie di pregunta na e mandatario. Segun Blok, a scohe pa un tratado cu tin un limite di 1 aña, pasobra e pensamento ta cu esey ta e tempo cu e crisis lo dura, y cu e ta un crisis ‘temporal’. A compronde tambe cu e ayudo lo no wordo atendi pa gobierno Mericano  mes, sino mas bien organisacionan cu ta wordo subisidia pa e gobierno. Mientrastanto e situacion na Venezuela no ta suficiente ‘sigur’ cu por transporta e ayudo di Corsou.  Si ta evaluando pa manda esaki pa paisnan bisiña manera Colombia y Brazil, aunke e mandatario no kier a duna comentario riba e detayesnan ey.