Van Dam: A reforsa Landsrecherche pa investiga mas caso estilo Ibis

ORANJESTAD – Despues cu Aruba a conoce e caso di corupcion gubernamental cu e nomber Ibis, unda cu corte a sentencia ex minister Paul Croes na 4 aña di castigo di prison, awor ex PG di Aruba Alexander van Dam a confirma den e programa NoticiaCla LIVE recientemente cu a inicia mas investigacion pa violacion di integridad. Van Dam a confirma cu a acumula suficiente informacion durante e proceso di investigacion di e caso Ibis, cu por crea mas caso igual, esta p.e. un Ibis, 2 te  Ibis 20 den forma di bisa. Mientras cu e no kier divulga ken(denan) ta esnan cu ta wordo investiga actualmente, a admiti cu landsrecherche a keda reforsa recientemente y cu trabounan ta wordo haci pa adkeri informacion necesario pa e siguiente casonan estilo Ibis. 

TBO y RST

E informacion cu a start mas investigacion awor, a bin a base di e pregunta durante e programa di NoticiaCla LIVE, conduci pa e moderador Tito Laclé riba constelacion di e asina yama RST (Recherche Samenwerkings Team) y TBO (Team Bestrijding Ondermijning) na Aruba y si van Dam ta positivo pa bin cu TBO y RST. Esaki contrariona pensamento di actual minister di husticia di Aruba Andin Bikker, cu a bisa NoticiaCla na un occasion, cu e no ta haya necesario pa tin tanto TBO y RST, pero cu RST so ta suficiente. TBO ta atende e parti di corupcion y ta parti di RST. Sinembargo, como cu Aruba no tin TBO (St Maarten y Corsou si), den caso di Ibis RST mester a haci e trabou di TBO tambe. “Mi ta na fabor di TBO na Aruba, y esey e minister sa tambe” van Dam a bisa durante e programa. “Nos ta haciendo e mesun investigacion cu TBO ta haci, pero cerca nos RST ta haci esey. Ibis a drai riba RST” van Dam a bisa. 

EXTRA CAPACIDAD

Van Dam a confirma cu RST aworaki a y ta wordo reforsa cu personanan extra, pa por sigui haci e trabounan necesario investigative pa  e proximo casonan cu ta na caminda. “E caso Ibis no ta solamente e unico caso (di violacion di integridad). Nos tin hopi mas informacion di violacion di integridad na Aruba. As we speak, nos ta bezig cu esaki y ta informacion cu ta sali di e investigacion Ibis. Awor nos ta sigui cu un otro (caso Ibis)” van Dam a sigui bisa. Segun e ex PG cu mientrastanto a bandona Aruba, Landsrecherche a laga sa cu nan no kier tin mas caso di corupcion y como tal kier caba cu tur. Ora cu a puntra PG si e kier men cu tin un Ibis 2 na caminda, van Dam a bisa cu tin asina hopi informacion adkeri cu por cuminsa un Ibis 2 te 20. Asina hopi informacion tin aworaki e ex PG a bisa. Van Dam sinembargo, no kier a confirma si e caso di Ibis 2 y otronan na caminda, ta trata tambe di otro mandatario of ex mandatario, pero a bisa solamente cu ta trata di ‘diferente caso’. “ Mi kier want’e te eynan” van Dam a sigui bisa. NoticiaCla a compronde si, cu awor tin varios persona ‘nervioso’ cu a cuminsa cu mas investigacion estilo Ibis, y cu no ta descarta cu mescos cu a sosode den e caso Ibis, cu detencionan lo cuminsa cay dentro di poco.