Despues di varios accidente, DOW a actua na Franse Pas

ORANJESTAD – Despues di un sin fin di accidente na e birada na Franse Pas ultimo lunanan, DOW a haci algo den forma di adapta cierto partinan. Un cantidad di auto (mas di 8) den un periodo cortico, tabata bolter of haya un otro tipo di accidente den e birada skerpi, cu a pone cu comunidad a cuminsa reacciona contra esaki. Tin tabata cuestiona e birada skerpi, otronan tabata culpa e automobilistanan cu diripiente tabata accidenta den e skina. E skina semper tabatey, pero diripiente accidentenan a cuminsa pasa tras di otro, practicamente semanalmente. A cuminsa te hasta papia cu mal spirito eybanda tabata influencia e automobilistanan. Gobierno inicialmente a bisa cu ta responsabilidad di automobilistanan pa haci algo, y tabata puntra kico nan (gobierno) mester a haci. Ta parse cu gobierno a scucha e criticanan y e siman aki por a nota cu departamento di Infrastructura / DOW a cuminsa pone reflectors (wowo di pushi)  y  pone borchi di aviso y reflectors grandi na e birada di Franse Pas pa alerta tur automobilistanan. E asunto aki a bira un topico di combersacion den comunidad, sigur riba rednan social, riba e tema di comportacion di nos automobilistanan.