Sentencia di rectificacion den disputa entre abogado y minister

ORANJESTAD – Minister Otmar Oduber no por a cuminsa cu e caso sumario contra Jan de Ruijter, ‘pa motibo cu e ta minister y e mester a busca ayudo profesional di media, busca abogado for di cuminsamento y no bin despues cu un hende a ataca bo pa dos aña caba, y cuminsa un kortgeding’. Abogado di Jan de Ruijter, Anthony Ruiz diaranson mainta durante un conferencia di prensa tabata na palabra. “No tin urgencia pa cuminsa e caso” Ruiz a lesa for di e sentencia di hues.

Sinembargo, for di oficina di minister Oduber mesora a bin e ponencia diaranson merdia, cu ‘e minister no a perde e caso. Ta mas bien hues a bisa cu mester cuminsa un bodemprocedure y no un caso sumario’. Como tal e oficina di e mandatario no ta considera cu e caso contra di de Ruijter e la perde. Riba esaki, abogado Ruiz a mustra cu Oduber “ a pidi pa wordo rectifica. Sr de Ruijter no mester rectifica. Sr de Ruijter por keda bisa cu Otmar Oduber ta un corupto, y ta facilita fraude”. “Y bosonan por ta sigur cu sr Oduber ta bay keda bisa esey”, Ruiz a sigui bisa. Ademas, Ruiz ta bisa cu usando e argumento di Oduber cu e (Oduber) no a perde, “Sr Oduber awor tin cu bay paga 3.900 florin na gasto di abogado y gasto di corte. Si ta para akinan cu bo no a perde, bo no ta wordo sentencia pa paga gasto di abogado”.

Mes momento, Ruiz ta sigura NoticiaCla.com cu Oduber por cuminsa un caso (bodemprocedure) cu lo por pone gana e caso finalmente. “Pero aworaki e la perde” Ruiz a bisa finalmente.

Minister Oduber mes no tabata disponibel pa un comentario. Ora cu esaki ta posible, lo actualisa e articulo. Y asina cu tin e vonnis disponibel, lo haci esaki tambe publico.