Overpas di Meiveld mester ta cla pa fin di augustus e aña aki

ORANJESTAD – Como parti di e trabounan di Watty Vos Boulevard, e compania Mota Engil mester completa dos ‘overpas’, osea viaducto prome cu fin di augustus 2019. Mientras cu uno ta den construccion, e otro ainda ta hopi mas curo y si nan no keda cla, e compania por haya su mes cu multa cu e tin cu paga pa incumplimento cu e tempo segun contracto. E compania tin 4 luna pa completa e trabou completo, y entre nan e overpas na Meiveld manera cu e potretnan di NoticiaCla ta mustra. E intencion ta pa e  rotonde di ‘Cumana’, mester conecta riba e overpas aki, cu ta splica e forma di haltura cu e rotonde a keda traha. Pues falta basta pa yena e caminda pa e por conecta riba esaki.