ORANJESTAD – Departamento di Ayudo Social (DAS) ta yuda y intermedia te caminda cu por. Asina e departamento a bisa diamars pa medio di un comunicado. Segun DAS, den e ultimo simannan aki tin diferente casonan cu ta ser treci dilanti, specificamente door di un reportero, unda lastimamente ta purba, door di expone bida y priva kibrando privacidad di personanan vulnerabel riba pantaya, di trece Departamento di Asunto Social (DAS) bou di un luz negativo. Sinembargo, DAS ta garantisa comunidad di Aruba cu e Departamento ta traha den forma di profesionalismo y ta traha specificamente den margen di ley.
Den bida tin biaha tin situacion cu ta haci cu un persona por hay’e den cualkier tipo di problema. Algun di e problemanan aki por wordo resolvi cu ayudo di DAS. No obstante esaki, DAS su deber ta pa actua conforme ley, ta yuda y intermedia te caminda cu por.
Como ehempel, DAS mes no ta dispone di paketenan di cuminda. Si DAS ta traha cu entre otro Fundacion Pa Nos Comunidad y otro instancianan, a base di cooperacion y ta intermedia pa yuda un cliente por haya pakete di cuminda via di un di e instancianan aki. Tin tambe e situacion di vivienda, unda cu DAS no ta dispone di cas propio, sino cu ta purba intermedia via FCCA pa un cliente haya un cas. Asina ta purba yuda intermedia cerca entre otro ELMAR, WEB, deurwaarder etc.
DAS ta pone enfasis cu tur esakinan ta a base di cooperacion y DAS no tin niun autoridad pa obliga un di e instancianan aki pa yuda. Pues ta keda na discrecion di e instancia pa yuda y na con hopi nan kier of por yuda. Tambe nos kier clarifica cu DAS no tin niun acuerdo cu Rode Kruis y te unda cu DAS por a compronde, nan no tin suficiente boluntario na e momento aki pa por yuda DAS den por ehempel vivienda di urgencia.
Manera por wak, DAS tey pa yuda e cliente pero DAS tambe tin su restriccion y mester tene cuenta cu diferente aspecto manera e.o. ley, e motibo di e crisis, cooperacion di otro instancia manera menciona anterior y algo hopi importante, cu ta e rol cu e cliente ta hunga cu ta importante den e solucion di su crisis personal, cual hopi bes ta un acumulacion di diferente problemanan no atendi ya pa un tempo largo di si bida. Esakinan tur mester tene na cuenta cu ne na momento di brinda sea ayudo financiero temporario, ayudo huridico y/o ayudo/guia psicosocial.
Finalmente DAS kier a pone cla na comunidad cu e Departamento ta kere fielmente cu e ta e deber di cada profesional den su ramo pa actua segun moral, norma y balor. Libertad di expresion ta un derecho cu cada un ciudadano mester por eherce, pero lastimamente tin reportero ta abusa di e privilegio, ta practica libertinahe y cu claramente un finalidad politico. Sinembargo, comunidad di Aruba por ta trankilo cu DAS ta uno cu ni den pasado, ni awo, lo wordo uza como instrumento politico y lo sigui eherce su debernan manera mester ta, yudando te caminda cu por.
DAS tey pa atende y preveni crisis pero e solucion no ta den DAS su man so. E ayudo clave ta den man di e cliente mes, e cliente mester acepta, ta habri, mester por wak y mester kier pa su situacion drecha. DAS su trahadonan social ta traha hopi duro na yuda soluciona casonan di crisis y DAS tin pleno confiansa den su trahadonan social cu ta profesionalnan den nan ramo.
Pa mas informacion tocante DAS su servicionan por yama na telefon 528-1100 of like nos pagina di Facebook “Departamento di Asunto Social” y keda na altura di tur informacion.
ORANJESTAD – Conocido presentador di television Hulandes Yvon Jaspers a tende cu e ta un condecorado Real, ora cu e tabata na Aruba e siman aki. E la yega Aruba diahuebs, y a haya e yamada diabierna mainta. Pesey e no por a ricibi e premio personalmente. Tabata alcalde di Loenen aan de Vecht, di su premio, cu e la ricibi pa su trabou di television. E ta enfoca riba e bida di cunukeronan Hulandes entre otro.
ORANJESTAD - Diabierna 26 di april 2024 pa 7’or di mainta (ora local) a publica e edicion special di Staatscourant incluyendo un lista di e personanan na kende a otorga un Condecoracion Real e aña aki. Tradicionalmente e momento festivo aki, tambe conoci como Ocasion General, ta relaciona cu e cumpleaño di Su Mahestad, Rey Willem-Alexander, cu ta e Granmaestro di e condecoracionnan. Por otorga un condecoracion na personanan cu a duna un contribucion special na e sociedad.
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.