Diahuebs awor Oficina di Turismo na San Nicolas tin su re-apertura!

SAN NICOLAS– Diahuebs awor Oficina di Turismo na San Nicolas tin su re-apertura! Durante conferencia di prensa recientemente, minister di Turismo Dangui Oduber a anuncia cu otro siman diahuebs 25 di april lo tin e re-apertura di e Oficina di turismo na San Nicolas. E oficina den e ultimo lunanan a wordo renoba y transforma completamente haciendo uzo di hopi tecnologia y inovacion. Esaki sigur ta un hopi bon noticia pa e pueblo di San Nicolas. E oficina di Turismo lo fungi como e “visitor center” e centro di informacion pa e turistanan, aki e turista lo haya tur informacion di tur locual San Nicolas tin pa ofrese! segun e mandatario.

PROYECTO BABY BEACH

Si tur cos cana segun plan e proyecto di Baby Beach lo cuminsa pa e prome siman di juni di e aña aki. E proyecto aki lo bira un proyecto di embeyesimento unda lo bay bin cu un restaurant. Lo bay drecha canchanan deportivo, construi un Boardwalk y facilidadnan di parkeo. Tambe lo bay construi un facilidad pa e persona cu lo fungi como esun cu lo bay haci e mantenimiento di e facilidadnan. Den e siman nan nos dilanti si tur cos ta bon e proyecto mester bay destaho publico pa determina ken ta gana e bidding, asina e mandatario a trece dilanti.