Minister a tuma medida temporal pa compensa pa problema cu edificio DIMAS

ORANJESTAD - Considerando cu DIMAS a ser sera pa motibonan conoci, NoticiaCla.com a compronde cu minister encarga cu permiso, Benny Sevinger a tuma e decision cu ta duna esnan cu a drenta Aruba na luna augustus, september y october 2014, un extension di nan estadia turistico automatico te maximo 90 dia. Manera ta conoci, hopi peticion cu tawata den tramite no a ser trata y tambe considerando cu hopi kisas no a logra di entrega nan aplicacion na DIMAS dor di e ciere temporal, Minister a tuma e decision aki, basta cu no a surpasa e 180 dianan pa aña calendario.

Generalmente e persona cu drenta como turista ta haya for di imigracion un acceso pa permanece aki na Aruba pa 30 dia. Un turista segun nos leynan vigente no mag di permanece pa mas di 180 dia pa aña calendario aki na Aruba. Un 98% mas of menos ta bai dentro di e 30 dianan concedi na nan. (Esnan cu tin propiedad na Aruba of tin nacionalidad Hulandes, por pidi na entrada na imigracion pa un cantidad di te 180 dia consecutivo. )Tin un cantidad di turista, mas tanto esnan cu ta bin pa bishita famia, cu ta bin DIMAS pa pidi pa un extension di nan estadia turistico.

Si no tin propiedad ni tin nacionalidad Hulandes, y ta cumpli cu e rekisitonan pidi segun maneho di minister Sevinger, DIMAS ta duna e aplicante un extension di te adicional 60 dia pa entrada, basta cu no a yega e 180 dianan maximo permiti pa aña calendario. . Personanan cu ta procedente di paisnan cu ta rekeri di visa, mester comproba cada biaha cu nan pidi visa pa bin Aruba cu den e bishita anterior nan no a surpasa nan estadia como turista y normal lo a haya un decision por escrito di DIMAS pa comproba tal. Awor considerando tur e circumstancianan, por bisa cu e personanan aki tin e extension duna automatico y DIMAS mes tambe lo informa embahadanan di e decision di minister aki. DIMAS ta preparando e comunicado pa prensa tambe pa informa e clientenan debidamente.