ORANJESTAD - Procurador-General di Aruba Alexander van Dam y e voorzitter di e Junta di Investigacion di Aviacion (Luchtvaartonderzoeksraad) di Aruba Claudio Stamper a firma un acuerdo riba 8 di april ultimo na Aruba.
Manera ta conoci, ora di un accidente di aviacion, por tin dos investigacion cu por tuma lugar. Un investigacion penal pa posibel actividadnan criminal y un otro investigacion door di e Junta di Investigacion pa identifica aprendizahenan di seguridad di aviacion pa asina preveni futuro incidentenan y accidentenan.
E ta un requisito di e Organizacion di Aviacion Civil Internacional (OACI) pa establece acuerdo entre e dos organizacionnan aki pa en caso cu e dos investigacionnan wordo haci simulteanamente. E protocolo ta encera acuerdonan di cooperacion y coordinacion, pa asina garantiza un separacion entre e dos investigacionnan y pa nan no influencia otro.
E negocionannan pa e protocol a cuminsa den transcurso di aña cu asistencia di Directie Luchtvaart. Cu e firmamento di e protocol, Aruba awor ta cumpli cu e requisito di OACI en cuestion.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.