Exposicion di “Spotter’s Day” door di Jean-Pierre Maduro

ORANJESTAD - Aruba Airport Authority N.V. (AAA) orguyosamente a tene su prome “Official Spotter’s Day” na Augustus 2018. Aeropuerto di Aruba a reconose cu tin un interes grandi pa “plane spotting” na nos isla. Mas y mas spotter ta tag Aeropuerto di Aruba den nan potretnan y pa e motibo ei a scohe pa crea un evento specialmente pa nan. Aeropuerto di Aruba a lansa e campaña “Calling All Spotters” na April 2018 y a ricibi un cantidad grandi di aplicante. Despues di e campaña, e proceso di screening a wordo haci pa a scohe e grupo di 10 spotter cu a cualifica pa participa den e prome evento “Official Spotter’s Day”. Banda di esei, e grupo selecta a wordo invita pa atende e “Safety Training” necesario na Aeropuerto di Aruba prome cu e evento a tuma lugar, pa sigura cu tur participante tabata na altura di e proceduranan di seguridad di aeropuerto na momento cu nan tabata riba airside pa saca nan potretnan.  

Como parti di e “Official Spotter’s Day”, tur spotter a haña e oportunidad pa manda nan 3 mihor potretnan na e ekipo di aeropuerto. E potretnan aki a wordo poni riba e rednan social di Aeropuerto di Aruba pa un competencia di votacion entre e siguidornan di aeropuerto. E spotter ganador, Jean-Pierre Maduro a gana un expo di su 10 mihor potretnan pa 1 aña den e terminal di aeropuerto.  

“Como 1 di e aeropuertonan lider den Caribe, continuamente nos ta purba crea oportunidadnan nobo pa haci nos posicion como aeropuerto mas fuerte den e industria y mantene e toke competitivo. Aunke hopi aeropuerto den Caribe ta conosi pa nan lugarnan specificamente asigna pa plane spotting, Aeropuerto di Aruba kier a haci algo extra pa e spotternan door di organisa e “Official Spotter's Day”. E ta nos honor pa premia e mihor spotter cu no 1, sino 2 expo den aeropuerto. E exponan aki situa na gate 4/5 y gate 2 ta yuda duna bida na aviacion na e parti paden tambe di aeropuerto. Nos ta felicita Jean-Pierre cu su bunita coleccion di potret di Aruba su aviacion", asina AAA su CEO Sr. James Fazio a bisa.

Spotter’s Day 2019 lo wordo teni dia 10 di Augustus, 2019, y e biaha aki tanto spotternan local y internacional ta invita pa inscribi pa e oportunidad unico aki. Sigui “Queen Beatrix International Airport” riba facebook, twitter y instagram pa ricibi mas informacion y detaye riba con pa inscribi pa Spotter’s Day 2019.