Corte a pospone sentencia caso Lotto pa di 7 biaha awe

ORANJESTAD – Corte a pospone e sentencia di caso di retiro di hunta di supervision di Fundacion Lotto Pa Deporte (FLPD) pa di 7 biaha awe. E sentencia cu tin cu determina si huez ta bai di acuerdo pa retira e hunta di supervision di FLPD ta poni awor pa dia 4 di juni proximo. Asina abogado di FLPD mr Peter Mohamed a confirma pa NoticiaCla. A compronde cu ta tardando hopi pasobra ‘ e sentencia por bira un decishon principal cu hopi consecuencia’. E caso mes a cuminsa na september aña pasa (2018) y cada luna a bin pospone e sentencia desde e momento ey. Ultimo biaha cu a pospone e caso tabata fin di maart di e aña aki. E caso ta uno cu gobierno di Aruba a pidi, pa e por tin un grip riba e fundacion. Aworaki e fundacion su hunta di supervision no kier retira, y segun e mandatario, ta strobando e di implementa su maneho. E hunta di nan banda ta mustra cu nan ta haciendo nan trabou y cu ta e minister ta esun cu ta strobando nan di traha. Como tal a bin cu un caso contra e mandatario, cu ta prohibit e mandatario mete, sino tin un multa. Awor e mandatario a informa (otro articulo) cu e lo viola e sentencia, contal cu e por denuncia e practica di fraude contra e hunta menciona.