Minister ta prefera paga multa, y denuncia Lotto

ORANJESTAD – Minister di deporte Dangui Oduber ta desafia menasa di hunta di supervision di Fundacion Lotto pa Deporte ( a opta pa publicamente menciona nomber di e miembronan cu ta VanEyte, Kock, Kamperveen, Janga), pa cobr’e multa impone, y cu e ta bay denuncia e corupcion den Lotto. E mandatario a referi na e sentencia di aña pasa cu ta duna Lotto ok pa impone multa si e mandatario ‘stroba’ e hunta di traha. Segun e minister e tin prueba cu e directiva a actua fraudulente y no ta bay keda keto. 

E REUNION

E mandatario ta referi na e reunion di dos siman cu e tabatin cu e directiva di Lotto. “ Siman pasa mi a dicidi di reuni cu e cartel di Lotto y alavez activistanan y amigonan di Mike Eman!” Oduber a pone riba su pagina di Facebook siman pasa. “ Durante e reunion aki mi a pidi e abusadornan aki pa entrega nan retiro voluntariamente mirando cuanto fiesta nan a haci riba custiya di pueblo y deportistanan. Mi a spera cu e sinverguenzanan aki lo a entrega nan retiro! Contario na esaki nan kier purba silencia mi!” Oduber a sigui skibi, refiriendo na e sentencia cu tin cu contra dje. E mandatario a duna e hunta un siman di tempo pa retira, sino e lo bay denuncia e miembronan publicamente. Envez cu e miembronan retira, nan a laga nan consehero huridico Kunneman, manda e mandatario un carta, informando e cu nan ta considera cu e mandatario ta violando e sentencia di aña pasa, (stroba e hunta di traha), pa cual nan ta bay cobra e multa cerca e mandatario, entrante 4 di april.   “Wel, nos ta lague den man di huez wak si huez lo aproba abuso y corupcion!” Oduber a sigui bisa riba Facebook. Dialuna e mandatario a confirma cu e ta prefera paga e multa, cu laga nan silencia su persona. 

CONFERENCIA DI PRENSA

Pruebanan cu e mandatario a bisa di tin ta uso di telefon desproporcional, papiando di gastonan halto di 13 mil florin den 4 luna di tempo, 200 mil florin na biahe y declaracionan haci cu no ta cuadra cu e tipo di servicio presta pa lotto. Segun e mandatario, ta logico cu e miembronan cu segun Oduber, ta ganando 6 pa 7 mil florin pa luna (e salario mas halto pa miembronan di un hunta di supervision), no kier baha di e stul, y ta ‘pega na e stul cu crazy glue’.