Aruba riba lista di paisnan mayor cu ta laba placa

WASHINGTON– Aruba ta aparece atrobe den e ultimo rapport Mericano riba narcotica, como un hurisdiccion mayor di labamento di placa pa aña 2018. E rapport ‘US International Narcotics Control Strategy Report (INCSR) ta keda publica dos biaha pa aña. Casonan cu a ‘yuda’ pone Aruba riba e lista ta esun e.o. ex minister Paul Croes y e otro Arubiano ex trahado di Setar cu a wordo gara na Merca pa labamento di placa. Hunto cu nan, un otro caso grandi, ta wordo menciona den e rapport annual. No obstante tur esfuerso (cu e rappor ta menciona tambe) cu Aruba ta y a haci pa bringa esaki, toch e ta aparece riba e lista. E unico dos paisnan cu ta afo, ta Puerto Rico y US Virgin Islands.  

ARUBA 

Manera indica, mientras cu Aruba ta aparece riba e lista, e rapport ta haci mencion tambe di tur e esfuersonan cu e isla ta hacienda pa combati e practica aki, y ta listra p.e. tur e acuerdonan cera cu instancianan internacional, y e logronan pa cu esaki. Loke ta ‘perhudica’ Aruba ta su ubicacion pa cu otro paisnan den region, cu ta hacie vulnerable pa ta un trampolin pa traficacion illicito y e casonan menciona unda cu cierto Arubianonan tabata envolvi den 2018. 

EX POLITICO Y EX TRAHADO DI SETAR

Den e rapport, aunke no ta haci mencion pa nomber, ta referi na e caso Ibis y ex minister Paul Croes, unda cu e tempo ey ta referi ainda na e ‘investigacion andando den un ex politico’ pa labamento di placa y . Ademas ta raporta specificamente di un caso unda cu a sentencia 4 sospechoso na castigo di prison pa ta envolvi den banconan subteraeno, labamento di placa, transferencia di cash, y pa no cumpli cu ley internacional riba e tema. E hendenan aki lo tabata transferi placa di Aruba pa China y di Aruba pa St Maarten y China. E sospechoso princioal tabata sospecha tambe di a coordina transferencia di placa pa hende di Surnam, Colombia y Venezuela pa China y Aruba. Ademas ta referi na e ex trahado di Setar,cu a admiti culpabilidad den labamento di placa pa su rol den regla y ricibi placa corupto, a cambio di contractnan lucrativo pa e compania nacional di telecomunicacion. Tur esaki ta wordo menciona den e rapport aki.   

MERCA Y HULANDA

Manera indica, Merca a te hasta pone su mes riba e lista aki, hunto cu Hulanda, Inglatera, y Spaña. Tur ta paisnan miembro fundador di Organization for Economic Co-operation and Development (OECD), cu OECD trahando hopi di cerca cu Union Europeo riba asuntonan di Resistencia di impuesto, cu ta crea e lista preto di paisnan cu ta considera un paraiso fiscal. Aruba ta riba e lista aki, y ta trahando pa kita su mes pa mei di e aña aki.  

SANCION

E INCSR rapport no ta indica si Merca lo impone sanccion Mericano como presion extra pa ta riba e lista di paisnan cu ta practica labamento di placa. Esey si ta e caso cu e lista preto di Union Europeo pa paisnan cu ta ‘paraiso fiscal’. Wak e rapport completo AKI.