Manifestantenan a exigi e.o, eleccion nobo pronto

ORANJESTAD – Un grupo di entre 250 pa 300 ciudadano a marcha bay rumbo Bestuurskantoor diabierna atardi, pa entrega un manifiesto na prome minister di Aruba Evelyn Wever Croes. ‘Pa motibo di e engaño electoral y pa motibo di tur e otro abusonan di poder cu MEP, POR y RED a y ta comete contra di Pueblo den nomber di pueblo di Aruba’, e grupo di manifestantenan lidera pa partido AVP, a exigi gabinete Evelyn Wever Croes pa cumpli cu por lo menos 8 punto, for di fecha di eleccion nobo, paro di introduccion di medida nobo, paro na persecucion politico, te pa para tur plan pa bende parti esencial di refineria. Un manifiesto di 2 pagina, tabata deliña e puntonan di e partido berde y e manifestantenan, cu splicacion y exigencia pa gabinete Wever Croes ehecuta e puntonan menciona.

SITUACION

For di tempran, autoridad a percura pa tuma medida strategico, cerando entre otro e caminda banda di Digicel, dilanti Wilhelmina Park y staciona e unidad mobil di polis. Pa loke ta gobierno, ta conoci cu nan a instala camera di vigilancia aunke no ta conoci si esaki tabata pa e manifestacion specificamente of no. Prome minister Evelyn Wever a anuncia delanta cu full su gabinete, cu excepcion di minister Maduro (na Merca pa trabou), lo atende y presenta pa ricibi e manifiesto. Mes momento a pidi pa simpatisantenan di gobierno no crea provocacion y pa duna tur espacio na e manifestantenan pa por expresa nan mes, algo cu ta nan pleno derecho. 

MARCHA

Algo despues di 4’or, e grupo di manifestante a sali for di e ex tereno di DOW, rumbo pa Bestuurskantoor, unda cu nan lo a entrega e manifiesto. Den careda di 6’or a dicidi di forma un grupo di 4 persona, incluyendo lider di partido Mike Eman, Rene Herde y Mike de Meza, cu a bay dilanti y a haci e entrega na e prome mandatario di e manifiesto. E permiso di e manifestantenan tabata di 4 pa 7pm pero pa 6:20pm, Eman a gradici e manifestantenan y a cera e evento y manda tur hende cas. Lesa e prome parti di e manifiesto AKI, y e di dos parti AKI.