Frank Hoevertsz satisfecho cu decision di corte

ORANJESTAD – Tres dia despues di e sentencia den caso di Frank Hoevertsz y Utilities, Hoevertsz a reacciona riba e veredicto pa e.o. NoticiaCla diabierna mainta. Den 10 punto, e ta resumi esaki, unda cu e ta mustra di ta contento y satisfecho cu e sentencia. Mes momento e  ta keda asombra pa e reaccion di gobierno, y ta haya cu si gobierno tabatin otro forma di pensa, e mester a informa Hoevertsz di e maneho nobo. Por lesa e reaccion integralmente aki bou. 

1.        Nos ta contentu y satisfecho cu e desishon di corte, pasobra tur accusashon contra sr Hoevertsz di parti di UA y gobiernu a wordu rechasa y corte tambe a disidi cu no tawatatin motibu urgente pa kita sr. Hoevertsz como director di UA. Pesey tur mancha riba reputashon, nomber y integridad di sr Hoevertsz a wordu kita. 

2.        Mi a tuma nota di e reacshon di partido MEP y Min-Pres sra Evelyn Wever-Croes riba e desishon di corte y mi a keda asombra dor di e reacshon ey pasobra e ta un mal-interpretashon di e desishon di corte. Segun Min-Pres corte lo a disidi cu sr. Hoevertsz no tin culpa di e mal maneho cu UA a hiba pasobra e lo a actua segun instruccion di e gobiernu anterior. Y pa e motibu ey ta e gobiernu anterior tin culpa di e mal maneho cu UA a hiba. 

3.        Esey ta un mal-interpretashon di e desishon di corte pasobra corte no a bisa ningun momento cu tawatatin mal maneho den UA den pasado. Al contrario, corte a bisa cu esun cu tin tur e culpa den e caso aki ta UA y e gobiernu nobo cu a bin na poder na anja 2017 pasobra a kita sr. Hoevertsz sin cu tawatatin motibu urgente pa hasi esey y pasobra a lanza un cantidad di accusashon falso contra dje.

4.        Locual corte a bisa over di e maneho di UA den pasado ta lo sigiuente. Por constata cu tin dos filosofia over di kiko e posishon di gobiernu como accionista mester ta den relashon cu UA, Elmar y WEB.  

5.        Gobiernu anterior tawata hanja cu como accionista mester dirigi e maneho di e cia-nan aki na un manera pro-activo y cu e cia-nan aki mester contribui na realisa e maneho di gobiernu riba terreno di energia, es decir promove energia sostenibel. 

6.        Gobiernu actual su filosofia ta cu gobiernu como accionista mester mantene distancia di e cia-nan aki y laga director y junta di comissarionan dirigi e empresa. 

7.        Pa disidi si e retiro di Hoevertsz tawata justo corte no ta hanja necessario pa disidi cua di e dos filosofianan aki ta correcto.  

8.        Pakiko no ? Pasobra e defensa di Hoevertsz cu el a actua riba instruccion di gobiernu anterior ta justifica mirando cu tin i) base den statuut di UA y ii) base den corporate governance code y iii) cu e cia-nan UA, Elmar y WEB tin un posishon clave den producshon, suministro y distribushon di energia, pa gobierno por duna instrucshon na directiva di UA riba e terreno aki. 

9.        E hecho cu e gobiernu nobo tin otro filosofia no ta kita cu ta trata die mesun accionista (es decir Pais Aruba) cu 8 anja largo a tolera otro maneho den UA cu e gobiernu actual. Locual e gobiernu nobo mester a hasi ta sinta cu sr Hoevertsz pa communica cu tin otro filosifia awor y cu gobiernu ta hanja cu e mester mantene su distancia di UA.

10.     Pa e motibu ey corte a bisa cu tur actividad cu a culpa Hoevertsz di dje manera 

(i)        organisashon di Green Conferences; 

(ii)       compra di edificio Edward Cheung pa hinca TNO Caribbean den dje y oficina di UA mes; 

(iii)      Biahenan pa promove Aruba como pionero riba terreno di energia sostenibel;

(iv)      promoshon di diferente proyectonan como parke di molino y solar panel projects; 

(v)       pagonan pa conseheronan y empresanan liga na gobiernu anterior pa servicionan cu a presta na UA; 

(vi)      e sosten cu a duna gobiernu den su esfuersonan pa habri refineria;

corte ta hanja cu e actividadnan ey tawata legitimo mirando e statuut di UA, e corporate governance code y e maneho y filosofia di gobiernu anterior over di su posishon como accionista di UA.

11.     Tumando tur esey den considerashon corte a stipula cu sr. Hoeevertsz mester hanja e suma di AWG 160 K pa cuminsa y cu e tambe tin derecho riba e suma di  compensashon cu a wordu combeni cu UA den su contract di empleo.