Z. Quandt sentencia na 10 aña di prison den caso morto ‘Ski’

ORANJESTAD – Corte a duna e sospechoso principal den morto di e homber Ski Arrindell, esta Z. Quandt 10 aña di prison (a pidi 18 aña), 4 aña jeugd detentie pa J. Boekhoudt, (conforme demanda), 2 aña interna den jeugdbehandeling pa S.Kock (a pidi 1 aña) . E sentencia a wordo lesa solamente pero no tabata disponibel pa publicacion. Asina cu esaki ta conoci, lo por tin mas informacion riba e otro sospechosonan y nan respectivo sentencia. E caso a tuma lugar 18 di augustus 2018, ora cu e persona Quandt lo a los e tiro cu a bin resulta fatal pa e ambulante Arrindell, y cu despues di algun dia a bin fayece. 

ADICIONAL

Oficialmente for di Ministerio Publico, NoticiaCla a ricibi esaki: Huez a condena e sospechoso cu a los e tironan (Z.Q. di 18 aña) pa un castigo di 10 aña pa homicidio di Hubert Arrindell y intento di homicidio di cuatro otro persona y posesion di arma di candela. Fiscal a exigi 18 aña contra dje. Huez a duna vrijspraak na e sospechoso cu tabata sinta na banda di e chofer (J.Werleman. di 23 aña). Fiscal a pidi 18 aña contra dje tambe. E caso di e chofer di e auto (R.N. di 18 aña) a bay pa 5 di juli venidero. Contra dje tambe fiscal a pidi 18 aña. Huez a condena e sospechoso cu tabatin 15 aña tempo di e sucedido, pa e PIJ-maatregel. Esey kier meen cu e lo wordo poni den un inrichting pa hobennan pa un minimo di 1 aña. E sospechoso cu tabatin 16 aña a wordo condena pa 4 aña di prison, di cual 1 aña ta condicional.