FGCA y UA cu lectura riba criminalidad gubernamental y minamento di estado

ORANJESTAD - Na september 2017, Fundashon Gobernashon di Calidad Aruba (FGCA), den estrecho coperashon cu Universidad di Aruba (UA) a organisa nan prome simposio tocante Calidad di gobernashon. Meta di e simposio tawata entre otro pa concientisa comunidad di Aruba tocante e concepto bon/mal gobernashon y su consecuencianan.

Na januari 2019 a organisa e di dos simposio en conhunto cu presentashon di presidente di Banco Central, prome ministro, lider di fracshon di e partido mas grandi di coalishon y procurador general. E biaha aki e meta tawata pa saca e tema di malgobernashon for di e esfera di tabu. Tambe pa mira di ki manera por mehora calidad di gobernashon concretamente. Di gran importancia tawata e echo cu tur cuatro orador a reconoce cu di berdad tin problema riba e tereno di gobernashon publico cu mester atende urgentemente.

Diamars benidero, dia 16 di april, FGCA y UA ta organisa un lectura den aula di Universidad cu e tema: ‘Criminalidad gubernamental y minamento di estado’. E pregunta central ta: Si ta trata di mal gobernashon (na unda entre otro ta viola ley y ta neglisha advertencia serio y recomendashonnan argumenta sistematicamente) cu consecuencia serio pa comunidad, por cualifica esey como criminalidad gubernamental?

E lectura ta cuminsa pa 7.00 di anochi cu un introducshon breve di parti di presidente di FGCA, sr. Armand Hessels. Despues rector di UA, esta mr. Glenn Thode lo duna un prome orientashon. E ‘keynotespeaker’, Profesor di Criminologia (Open Universiteit y VU Amsterdam) Emile Kolthoff ta sigui elabora riba e tema. Desde 8.00’or tin espacio pa pregunta y debate bou di guia di Profesor di Derecho Criminal (Erasmus Universiteit) Evert Stamhuis. E lecturanan lo ta na Ingles.