Polis sub inspector y un civil deteni pa asunto di radio

ORANJESTAD – Landsrecherche a detene un polis sub inspector A. Murray pa asunto di radio di polis ‘perdi’. NoticiaCla a haya confirma tambe pa vocero di ministerio publico Ann Angela cu un otro persona tambe a keda deteni, y lo ta ruman di un di e periodistanan cu tabata deteni prome. Algun tempo atras, e grupo di periodista ey y algun polis a keda deteni caba pa e asunto aki, pero mientrastanto tur a recobra nan libertad pendiente e caso. Recientemente ministerio publico a confirma cu ‘pa mitar di e aña aki e caso lo bin dilanti’. Tur esnan cu tabata deteni den e caso aki, ta keda sospechoso aunke cu nan ta den libertad. Pa loke ta e polis di rango halto deteni, e portal aki a compronde cu no ta descarta cu mas detencion lo por cay den seno policial, y tambe di algun otro civil. Mientrastanto e grupo di persona cu tabata deteni, entre nan varios periodista, ta alega cu ta trata di persecusion politico. Recientemente parti di e grupo di periodista cu tabata deteni, tabata na un congreso di IAPA/SIP, unda cu nan a denuncia e gobierno actual pa persecusion politico. Algun dia despues, e minister di e gabinete actual a manda un carta, refutando e acusacionan di e periodistanan.