DNM a raporta caso di eco vandalismo na Baby Beach

ORANJESTAD -  Directie Natuur en Millieu (DNM) a raporta un caso di eco vandalismo na Baby Beach diaranson. Segun e departamento riba nan pagina di Facebook, nan a publica algun potret di loke nan ta yama ‘rock stacking’, esta stiwa piedra riba otro pa crea un tipo di arte, of den e caso aki, skibi un mensahe. E mensahe e biaha aki tabata un declaracion di matrimonio, esta un persona ta puntra un otro (na spaño) si e kier casa cu ne. Tambe nan ta yama esaki un tipo di graffiti. E departamento a haci un yamada na comunidad y bishitante pa no haci e actonan aki contra naturalesa y su ecosystema. “Rock stacking como tambe rock-graffiti tambe ta un acto clasifica como eco vandalismo. Stop- Ban Serio!” e mensahe ta sigui bisa. 

STIWA PIEDRADen pasado caba na costa norte di Aruba tabatin henter un area cu a bira te hasta ‘popular’ pa e forma con turista y otro personanan tabata staka e piedranan riba otro, creando un of otro ‘obheto’. Tin cu tabata haye algo ‘apart’ mientras cu otronan tabata hayele malo. A yega di tene actividad unda cu ta bay cu un palo, bate di baseball of mockel, y ta kibra mas hopi di e stakanan aki. Pero pa hopi tempo no a tende nada mas, te cu awe un biaha mas, den un forma  di ‘concientisacion’ esaki a bin den publicidad atrobe.