Prensa a haya oportunidad pa ‘test’ helicopter di polis di Aruba

ORANJESTAD – Diaranson merdia, prensa y algun otro invitado a haya oportunidad pa ‘test’ e helicopter di polis di Aruba. Tabata 16 di maart ultimo cu e helicopter a yega Aruba, y ya e siman despues a cuminsa opera y logra varios trabou di polis. Diaranson prensa a experencia e buelo, pa wak cu su mesun wowo, kico tur e helicopter por y con e ta funciona. Den grupo di 4 cada bez, e miembronan di prensa a bula 10 minuut cada uno riba un haltura di 500 meter, y haya un bista diferente di Aruba. E helicopter ta di un compania Colombiano di cual gobierno di Aruba ta lease, completo cu piloto Tito Andrade.  

SPECIFICACION

E helicopter ta un Bell 2016 L3 cu tin un motor Rolls-Royce 250-C30P di 650 Takeoff. Su capacidad ta di 6 pasahero mas 1 piloto y tin diferente aparato sofistica pa patruya Aruba su fronteranan. Tambe e helicopter por yuda den caso di emergencia pa transporta persona herida, special ora un persona accidente den cierto area cu ta dificil pa yega cu vehiculo. E empresa ta duna servicio tecnico pa loke ta mantencion y reparacion mirando cu nan tin flota grandi pa duna servicio optimal. Tur loke a menciona di e helicopter ta den cuadro financiero aproba pa Parlamento di Aruba.