Plasterk: KB cu Aruba a haya ta legal y gobernador a actua corecto

DEN HAAG – E aanwijzing (koninklijk besluit) cu gobernador di Aruba a haya ta legal, y gobernador a actua corecto. Esaki ta e reaccion di minister di Relacionnan di Reino Hulandes Ronald Plasterk riba e conseho cu entre otro Raad van Advies di Aruba y miembronan independiente di Raad van State a duna recientemente. Plasterk no ta comparti e conseho aki y den un contesta na parlamentario Andre Bosman, ta elabora riba su reaccion. Bosman a haci e mandatario un cantidad di pregunta basa riba e declaracionnan haci di miembronan di conseho consultativo di varios isla, incluyendo e conseho recien di Raad van Advies di Aruba.

Pa mustra su punto, Plasterk ta repasa e ley y regla cu tanto Hulanda como gobernador a aplica den nan respectivo accionnan. Y manera cu e reglanan ta mustra claramente segun e mandatario, gobernador a actua manera cu semper e la actua ora cu mester aproba un ley. Den e caso particular aki, no ta asina cu ora cu gobernador a analisa e legalidad di e presupuesto 2014, cu ‘diripiente’ e la añadi un poder extra cu e lo ‘no tabatin prome’, segun Plasterk.

Den sirbimento di interes di Reino, gobernador mester sigui e ‘aanwijzing’ of ‘instruccion’ di Gobierno di Reino. Y e ta haci esaki segun articulo 15 di e reglamento di gobernador segun Plasterk. Den caso di e KB referente na e presupuesto 2014, e gobernador a wordo instrui pa haci un investigacion, pa asina e por determina e mihor decision pa e tuma na final di e investigacion. Pa e decision e ora, e mester warda (a base di e KB) e investigacion termina y tambe pa un eventual comentario di gobierno, pa asina e por determina si tabatin enberdad un situacion conforme articulo 21 di reglamento di gobernador.

Y segun Plasterk, e ‘instruccion’ of ‘aanwijzing’ tambe ta determina ki ora e ‘paro di actua’ ta caduca (esta pa no firma e ley). Pues e investigacion ta presidi e proceso di decision di gobernador, y e fase pa dicidi riba e aplicacion di articulo 21 ta bin despues. Ta despues cu e investigacion conforme e instruccion wordo ehecuta, ta bin e fase unda cu gobernador, -si e ta bou di pensamento cu tin algo no corecto-, ta avisa Gobierno di Reino di esaki. Gobernador ta haci esaki como un organo di Reino.

Plasterk ta sigui bisa pues cu e ta conclui cu e KB a wordo uza den cuadro di e garantia di funcionamento di Reino. “Esey ta conclui tambe di e texto di articulo 21, y e splicacion adicional riba esaki. “Como tal e instruccion (aanwijzing) no tin relacion riba e tarea di gobernador como un organo gubernamental” Plasterk ta sigui bisa. “Como tal no por papia di un infraccion riba e autonomia”.

Riba e comentarionan di e miembronan di Raad, Plasterk ta bisa cu e representante di Raad pa Aruba, a haci su declaracionnan recien ‘prome cu e tabata miembro di Raad van State” di Reino. Fuera di esey, e presidente di Raad van Advies di Aruba no a duna un comentario ‘personal’. “ E miembronan di e departamento di conseho di Raad van State di Reino tin e responsabilidad di ta ‘prudente’ ora cu ta trata di opinionnan y mester tene cuenta cu e posicion di Raad van State (di Reino)” Plasterk a sigui bisa. Tambe, Plasterk ta bisa cu riba peticion, nan lo wordo atendi riba esaki door di e hefe di e departamento di conseho. “Mi no ta reacciona riba declaracionnan individual di un miembro di un Raad. Segun Plasterk, e conseho di e departamento di conseho di Raad van State, ta wordo prepara den conhunto y consensus, pa asina cualkier observacion persona, cu no ta wordo comparti en general, wordo subordina. (lesa e contestanan di Plasterk aki).

Tabata algun siman pasa cu Raad van Advies di Aruba a emiti nan conseho riba e presuspuesto supletorio y cune, e conseho riba e valides di e KB. AKi nan a bisa cu e Koninklijk Besluit, of aanwijzing cu gobernador di Aruba a haya algun luna pasa, no ta uno legal y corecto. Segun un rapport di Raad van Advies di Aruba riba e presupuesto supletorio 2014, gobernador a haya instruccion y conseho robes. E rapport cu a cay den man di NoticiaCla.com diaranson atardi, ta mustra cu e organo consultativo local RvA a haci un investigacion riba e presupuesto supletorio 2014 y mes momento a toca e legalidad di e KB, y a bin conclui cu e consehonan cu gobernador a ricibi, no tabata corecto pa cual e KB no ta na su lugar. Gobernador, conoci como un persona integro y cu semper ta actua corecto, lo a sigui e conseho cu bon intencion, haciendo loke ( segun su persona y consenshi) mester tabata regla. Lamentablemente a resulta, cu e tabata basa riba informacion y conseho robes, cu tur su consecuencia. Kico esaki ta nifica pa gobernador y gobierno no ta conoci, pero NoticiaCla.com a haya confirmacion di gobierno cu nan a ricibi e rapport aki y lo por duna mas informacion dentro di poco.

Mes momento NoticiaCla.com a compronde cu esaki no ta nifica si cu Hulanda necesariamente lo cancela e KB awor y revoca tur loke a sosode. E conseho, ta keda un conseho y ta na gobierno di Reino pa dicidi kico na ta haci cune. E loke por sosode awor, segun NoticiaCla.com a compronde, ta cu mas probablemente ora cu tur cos ta tras di lomba, cu gobierno di Reino lo ‘toets’ esaki y wak kico tur a bay bon y of malo, mirando cu ta trata di un ‘novum’.

Mes momento e conseho di RvA a bisa cu gobernador di Aruba mester firma e presupuesto 2014. Esaki ta e conclusion di e rapport di 13 pagina di Raad van Advies, cu NoticiaCla.com a referi na dje diahuebs ultimo. E rapport mes a keda entrega na minister di finanza Angel Bermudez, cu a confirma esaki tambe na NoticiaCla.com. Segun e conclusion di RvA, cu e cambionan cu gobierno di Aruba a presenta den e presupuesto supletorio, e ta ‘presenta’ e situacion ‘real’ pa 2014. Mes momento sinembargo, RvA ta mustra tambe cu no tin motibo pa ‘wanta’ e presupuesto 2014 mas pasobra e ta carece di base legal’.

Den e rapport, RvA tin un seccion unda cu e ta haci un ‘evaluacion huridico’ di e KB, y ta bin cu 10 motibo pa cual e KB de hecho no tin legalidad mas. Punto 2.6 ta mustra na final di e articulo ey, cu no por wanta e presupuesto mas di wordo firma. Un otro punto, 2.7, ta mustra cu a cita contenido di e articulo 21 di e regla di gobernador, robez. Na punto 2.8, e opcion cu e KB ta bringa gobierno di Aruba, no ta cuadra cu realidad y ta conclui cu gobierno di Aruba a tuma e decision corecto. Di otro banda, RvA na punto 2.9 ta mustra si cu e presupuesto 2014 manera cu e tabata, tabata uno irealistico, y e hecho cu a uza CFT pa haci coreccion, ta un decision y escohencia logico, mirando e trabounan cu CFT ta haciendo den region caba.

Mas aleu, referiendo na e KB, RvA ta mustra tambe cu si gobierno di Aruba bay di acuerdo cu e ‘reclamo’ di e organo consultativo di Aruba, no mester aplica e articulonan 3, 4 y 5 di e KB.(lesa e KB aki atrobe) Y ta aki RvA ta referi na e hecho cu gobernador no tin base pa wanta e presupuesto 2014 mas tempo sin firma.

Pa loke ta e contenido di e presupuesto ‘supletorio’, RvA ta mustra cu esaki ta corecto, y tur e asina yama ‘stelposten’ (postnan cu no por a determina kico lo a pasa cu e placa y unda cu esaki lo a bay of bin), tambe no ‘tey mas’. Pues e adaptacionnan cu gobierno a haci, ta suficiente y ta complace RvA.(lesa e rapport completo aki)