Militarnan di Aruba y Corsou ta reforsa Warda Costa riba laman awor

WILLEMSTAD/ORANJESTAD - Militarnanan lo reforsa Warda Costa pa sigui intensiva e patruyanan riba laman. For di e siman aki militarnan di Corsou i Aruba lo ta forma parti di e patruyanan di Warda Costa por lo pronto. Esaki ta un iniciativa di e director mes di Warda Costa Caribe Hulandes, cu a mira e necesidad di intensiva e control. E militarnan a ricibi un entrenamento intensivo hunto cu personal di Warda Costa pa nan por siña e trabou riba laman.

UNIDADNAN

Warda Costa ta hasi uzo di tur su unidadnan pa detecta practicanan ilegal riba laman. E operacionnan di Warda Costa lo continua cu refuerso di e militarnan, e barco di patruya, Zr.Ms. Zeeland i su helicopter NH-90 pa por proteha e awanan teritorial. Ciudadanonan por yama riba e number 913, na momento cu nan mira algo sospechoso riba laman.

RESPONSABILIDAD

NoticiaCla a compronde mientrastanto cu e problema no ta uno solamente cu Warda Costa y Militarnan Hulandes por atende, pero cu tin henter un ciclo di actividad cu ta opera cu mester di atencion. For di momento cu tin e demanda di hende pa bin Aruba den un forma clandestino, te na e capitan di boto cu tin cu organiza e biahe, e biahe mes, y despues ora cu nan yega Aruba, ora cu te hasta Rubianonan ta yuda e personanan illegal aki cu hospedahe y trabou. E parti di marina y Warda Costa ta apenas un parti di e control, pero si tur otro departamento no haci nan trabou di control, e esfuersonan di Warda Costa y Marina, ta inutil, den sentido cu ta hiba awa laman.