Knops kier Parlamento di Aruba pone mas prioridad pa ley di LAFT

ORANJESTAD – Secretario di estado Hulandes Raymond Knops no ta mucho contento cu ainda Parlamento di Aruba no a pasa e ley di LAFT. El a mustra su irritacion dialuna durante un conferencia di prensa riba e tema, durante un pregunta di NoticiaCla. “Nos a haci un palabracion na november y nos ta awor den april. Mi ta pensa cu esaki ta un topico importante y Parlamento por pone poco priodad den e asunto ” Knops a bisa. “Mi no ta e tipo di hende cu ta haci cos lento”. E mandatario ta referi na e hecho cu tin un tardansa grandi den tratamento di e ley, siendo cu e protocol firma na november, ta stipula cu mas tarda fin di aña 2018, mester a pasa e ley pa despues Conseho di Reino Hulandes aproba e contenido finalmente. Di otro banda, NoticiaCla a compronde cu e problema no ta Parlamento, pasobra Parlamento no a ricibi e ley ainda, te pa nan pase. Pues e ley ta pega na gobierno y Parlamento no a haye mes pa trata. No obstante esey, Knops su reclamo tabata dirigi na Parlamento di Aruba. Den pasado caba e mandatario a bisa caba cu ta keda na gobierno di Aruba con ta 'bende' e ley su contenido na Parlamento, pero e palabracion ta wordo haci entre gobierno di Aruba y Hulanda. 'Con esaki ta wordo bendi na Parlamento, ta un asunto netamente di Aruba" Knops a bisa den un otro ocasion.