Director nobo di aeropuerto Reina Beatrix ancioso pa cuminsa traha

Director nobo di aeropuerto Reina Beatrix ancioso pa cuminsa traha

Posted on 04/9/2019 11:43 am AST | Updated on 04/9/2019 11:45 am AST

ORANJESTAD – E director nobo di aeropuerto Reina Beatrix Joost Meijs, ta ancioso pa cuminsa traha. Asina e ta bisa segun un comunicado di Aruba Airport Authority NV (AAA) confirmando e noticia di NoticiaCla di ayera cu nos ta haya un director nobo. 

 E comunicado ta confirma cu Meijs, CEO di Eindhoven Airport, desde 1 di September 2019 lo cuminsa fungi den nomber di Royal Schiphol Group como CEO di Aeropuerto Internacional Reina Beatrix; tumando over di James Fazio, cu desde 2014 tabata e aeropuerto su CEO. Sr. Meijs lo ta responsabel pa e desaroyo di maneho y organisacion, mantencion di contacto cu stakeholdernan externo, y lo guia aeropuerto su proyecto di expansion, mirando cu e ta duna inicio na un programa di inversion di capital y construccion significante di 5 aña cu un balor di 300 miyon dollar. E hunta di supervision di Eindhoven Airport lo ta en busca di e sucesor adecua den e periodo nos dilanti. 

Lagando su posicion existente atras, Meijs lo a traha cu Eindhoven Airport pa 13 aña. El a cuminsa riba 1 di Maart 2006 como “Director of Commercial Services & PR”. Despues di un periodo cortico como “Deputy Director”, el a bira “General Manager / CEO” di e aeropuerto riba 1 di Oktober, 2008.

Durante su carera na Eindhoven Airport, e aeropuerto a transforma di un aeropuerto cu ta atende mas di 1 miyon pasahero den 2006 pa un aeropuerto cu ta atende mas di 6.5 miyon pasahero den 2019. E segundo aeropuerto den Hulanda ta ofrece coneccionnan directo pa mas di 80 destinacion den y pafo di Europa. 

Den cuadro di infrastructura, e aeropuerto a expande considerablemente. Na 2013, un hotel (perteneciendo na Eindhoven Airport) y un extension di terminal di tereno y aereo a wordo entrega. Un “baggage hall” completamente nobo a wordo habri na 2016. Como parti di e construccion di e Eindhoven Airport Boulevard, cu ta wordo spera cu lo keda completa na anja 2020, e parkeo reconstrui lo habri na Oktober.

Despues di un periodo di crecimento cuantitativo rapido, e aeropuerto a anuncia na final di 2018 un cambio di rumbo pa bai mas den e direccion di desaroyo cualitativo. E strategia aki ta pa yuda sigura cu Eindhoven Airport ta duna un contribucion significante na e sociedad sostenibel den e siguiente 10 añanan cu ta den liña cu desaroyonan regional di Brainport.

Joost Meijs:“Mi ta sumamente orguyoso di e logronan colectivo di e ekipo cu a garantisa e exito di Eindhoven Airport. Mi tabata hopi contento pa guia e aeropuerto unda cu partidonan publico y priva ta encontra otro. Tresiendo interesnan cu ta aparenta contrario mas serca cu ta posibel na otro, a inspira mi desde comienso te final. Na mes momento, mi ta ansioso pa por contribui na e exito di e aeropuerto internacional di Aruba y mi ta hopi impreshona cu tur loke a wordo alcansa te cu aworaki door di James Fazio y su ekipo.”

Jabine van der Meijs, CFO di Royal Schiphol Group: “Bou di e liderasgo di Joost Meijs, Eindhoven Airport a crese den un aeropuerto fuerte – despues di Schiphol birando e segundo aeropuerto den Hulanda – cu tin hopi balor tanto den region como tambe pa Royal Schiphol Group. Joost su conocemento amplio y experiencia lo ta hopi valioso pa sigui desaroya Aeropuerto Internacional Reina Beatrix. Nos ta desee hopi exito cu esaki."

Aeropuerto Internacional Reina Beatrix ta wordo opera y maneha pa Aruba Airport Authority N.V. (AAA). AAA tin un partnership strategico cu Royal Schiphol Group pa 15 aña caba y su CEO actual Sr. James Fazio, recientemente a anuncia su decision personal pa laga e posicion di CEO di AAA atras na final di e acuerdo di empleo actual cu ta termina 31 di Augustus 2019. 

Sr. Fazio a traha pa Royal Schiphol Group pa e ultimo 22 añanan, despues cu el a cuminsa na 1997 como parti di e ekipo cu a privatisa, desaroya y despues opera JFK su terminal 4, y mas recientemente tabata CEO di aeropuerto di Aruba pa e ultimo 5 añanan. Prome cu su tempo cu Schiphol Sr. Fazio tabata emplea pa 12 aña pa Port Authority of New York y New Jersey, unda el a traha den varioso posicion di supervision den e area di operacion di aeropuerto. Durante su tempo na Aruba, banda di a alcansa diferente logro, a brinda liderazgo y guia pa e proyecto di expansion Gateway 2030 di aeropuerto. Sr. Fazio a comenta riba e “timing” di su decishon: “Aeropuerto ta transicionando for di e fase di planiamento pa e fase di construccion di e proyecto Gateway 2030, cu a rekeri e decision dificil pa wak si lo keda 5 aña mas of no, y basa riba motibonan personal, mi deseo ta pa ta mas serca di mi famia y amistadnan y continua cu mi carera bek na New York. Royal Schiphol Group a identifica un candidato como mi sucesor, y den e proximo siman mas o menos e CEO nobo lo bishita Aruba y lo wordo introduci na e Accionista, Hunta di Supervision, y staf di AAA.” Esaki ta un transicion plania pa permiti un transicion di 4 pa 5 luna, y pa prepara e siguiente CEO debidamente pa e proyecto di construccion cu ta na caminda y pa asina e por asumi e responsabilidad pa lidera aeropuerto. 

“Mi kier enfatisa cu mi a disfruta di mi tempo na Aruba y ta sinti mi honra di a wordo confia pa lidera Aruba su aeropuerto nacional pa e ultimo 5 añanan y mi lo sigui ta 100% comprometi na AAA durante e resto di tempo cu mi tin aki; como cu nos tin varios milestone relata cu e Proyecto pa crusa den e lunanan nos dilanti.”  

AAA ta gradici Sr. Fazio pa su esfuersonan pa sigui desaroya e aeropuerto creciente y ta desea Sr. Fazio tur cos bon den su siguiente metanan personal y ta yama bonbini na Sr. Joost Meijs na e ekipo di AAA.  

  • Aruba Bank ta lansa su campaña di Cuenta di Studiante

    Aruba Bank ta lansa su campaña di Cuenta di Studiante

    ORANJESTAD –   Aruba Bank a lansa su campaña di Cuenta di Studiante pa tur studiante di Aruba, sea e studiante lo continua cu su estudio den exterior, of si e lo continua cu su studio na Aruba mes. E Cuenta di Studiante ta ofrece e studiante hopi beneficio, entre otro e lo ricibi su propio Aruba Bank Mastercard Debit cu Maestro pa haci compras local, internacional y tambe Online 24/7/365, tambe e studiante lo tin acceso pa haci uso di e Aruba Bank App, y hopi mas.

  • A logra evita bancarota di establecimento La Linda

    A logra evita bancarota di establecimento La Linda

    ORANJESTAD – Tin indicacion cu e establecimento La Linda a scapa un bancarota. Asina NoticiaCla a compronde di un di e abogadonan encarga Peter Mohamed. “La Linda ta finalisando un areglo cu abogado di e trahadonan”. Manera ta conoci, tabatin un situacion basta fastioso deslumbrando, unda cu tur cos tabata mustra cu esaki lo tabata e final di e compania. Pero esaki menos mal a keda regla y cu por a evita un situacion di bancarota. Pa varios luna tabatin un incertidumbre pa e trahadonan cu tin hopi pero hopi aña trahando cu e compania. Tabatin un duda si e compania ta sobrevivi e crisis cu a surgi dado momento ora cu un di e doñonan a fayece. Dado momento a logra reestablece un situacion di tal forma cu e negoshi por a cuminsa opera atrobe aunke di forma modera.   

  • Lotto cu chens pa bo gana 570 mil florin cu Mega Plus awe!

    Lotto cu chens pa bo gana 570 mil florin cu Mega Plus awe!
  • AHATA: Na Mei mayoria di hotel a experiencia un tiki menos ocupacion

    AHATA: Na Mei mayoria di hotel a experiencia un tiki menos ocupacion

    ORANJESTAD - Aruba Hotel & Tourism Association (AHATA)  a acumula e cifranan di ocupacion y prijs di hotelnan pa luna di Mei 2019 y CEO di AHATA Tisa LaSorte a anuncia cu na Mei por mira e ocupacion baha un tiki. Aruba su turismo a experiencia extra crecemento desde e horcannan di September 2017 den Caribe, y awor cu e inventario den Caribe ta habriendo bek ta di spera cu demanda pa Aruba lo normaliza poco poco. Mientrastanto tin bon demanda ainda, pa cual motibo mayoria di hotel por cobra un tarifa mas halto, aunke e balornan den luna di Mei ta mas abou cu e lunanan di high season. 

  • CAFT ta cancela biahe pa Aruba debi na cambio di LAFT

    CAFT ta cancela biahe pa Aruba debi na cambio di LAFT

    ORANJESTAD – E cambio di ley di LAFT a conoce su prome efecto, casi un siman despues cu Parlamento di Aruba a cambia e ley cu pasonan fundamental. E colegio di supervision financiero di Aruba CAFT ta mustra gobierno diaranson riba incumplimento di e protocol firma aña pasa y ta mustra cu nan prome accion ta consecuentemente pa pospone nan bishita proximo pa Aruba. 

  • Maduro: No a dicidi ainda si ta introduci sugar tax na Aruba

    Maduro: No a dicidi ainda si ta introduci sugar tax na Aruba

    ORANJESTAD – Gobierno no ta logra introduci e asina yama ‘sugar tax’ pa 1 di juli 2019. Asina minister di Finanza Xiomara Maduro a confirma pa NoticiaCla. De hecho, no ta sigur mes cu e sugar tax lo keda introduci como un di e impuestonan ‘vicioso’. Esaki pasobra simplemente no a tuma un decision final riba e asunto segun Maduro. Cu e introduccion aki, e impuesto lo mester a genera 16 miyon florin extra pa caha di gobierno. Algo cu awor no ta parse di ta algo sigur. 

  • Powered by SETAR