Minister: Nos ta resolviendo conflictonan na dept Sociale Zaken

ORANJESTAD – “ Esnan cu a organisa e 'walk out" (di departamento di Asuntonan Social siman pasa) hunto cu (sindicato) TOPA a duna nos un luna pa resolve algun issue” ta loke cu minister di labor, Paul Croes a sigura NoticiaCla.com diamars mainta. Y segun e mandatario, ya dialuna, e la reuni cu Directora di Dept Social. “ Aki mi a anuncia na su persona cu durante ultimo conseho di Minister diabierna nos a tuma algun desisionnan importante” Croes a sigui bisa riba e asunto di siman pasa.

Entre e desisionnan tuma, ta figura cu 1. Edificio di Centro Medico lo ta cla pa habri bek y diferente afdelingen di Directie Sociale Zaken lo bolbe San Nicolas. Esaki lo baha e presion di cantidad di personal na Lagoonweg considerablemente. 2. E sumanan cu mester pa inversion pa 6 airconditioned nobo tambe a keda aprobe den minister raad (hunto cu Minister di finanzas). “ Esaki lo hasi e situacion di presion di oficina tambe mas alivia” Croes a bisa NoticiaCla.com brevemente. Como tal lo soluciona e situacion den un tempo mucho mas lihe, segun Croes, cu nan a haya pa haci esaki. E foto ta cortesia di ministerio di Labor, unda cu e minister a reuni cu e hefe di departamento di asuntonan social dialuna.