Corte: No por culpa Frank Hoevertsz di mal maneho di Utilities

ORANJESTAD – Corte ta dissolve e contracto di trabou entre Utilities NV y su director Frank Hoeverstz entrante 1 di mei, y ta otorga Hoevertsz un suma ‘temporal’ di AFL 166.540, = pendiente e suma cu partidonan a ‘yega na acuerdo’. E suma minimal cu Hoevertsz a pidi, ta AFL 540.226.20. Mes momento Corte a bisa cu no por culpa Hoevertsz di mal maneho e.o. y a desbarata tur 5 punto cu Utilities NV a presenta cu mester a hustifica e retiro inmediato como director di Hoevertsz. Asina mes, huez a bay di acuerdo pa desolve e contracto cu Hoevertsz. 

E CASO

Utilities a presenta 5 punto pa cual Hoevertsz mester a wordo retira inmediatamente. Nan ta entre otro cu Hoevertsz a permiti cu Utilities e tempo ey a surpasa su metanan di operacion y a haci cos cu no ta toca e compania pa haci. E hecho cu ta tilda e gobierno anterior di metemento y cu Hoevertsz no mester a presta su mes pa coopera, no por culpa Hoevertsz di esey segun corte. Esey ta encera compra di tereno cu placa di Utilities, organiza e conferencianan ‘berde’, decisionan personal tuma pa Hoevertsz , duna voorschot na gobierno, haci gasto sin aprobacion previo di hunta di comisario, empleo di amigonan di Hoevertsz, falta di tin un plan strategico y un analisis di gasto y entrada. Pa cada punto, Corte a desbarata e ponencia cu Utilities kier a culpa Hoevertsz di esaki. 

CAMBIA MANEHO

Den corte durante e caso, abogado pa Utilities a argumenta esey tambe indicando cu no por ta asina cu pa 8 aña a tolera y laga Hoevertsz funciona conforme e asina yama ‘reunion general di accionistanan’ y awor kier punta tur fayo of keho riba Hoevertsz. Abogado Sjiem Fat (Utilities) a bisa den corte durante e tratamento cu gobierno a surpasa su rol, ya cu e kier husga un maneho di pasado, y label esaki como ‘no corecto’, siendo cu e gobierno di e tempo ey, tabatin e prerogativo. Si e gobierno nobo kier cambia e maneho nobo, e por haci esey, pero no por culpa Hoevertsz di e maneho y metemento di e gobierno anterior den Utilities. 

SENTENCIA

Pa loke ta e sentencia, Corte a mustra Utilities riba e reglanan y statuto, cu ta sigura cu tanto gobierno anterior como Hoevertsz a actua corecto y no a haci nada malo. Den corte, a nota cu sea cu Utilities no a argumenta e puntonan suficiente, of simplemente no por tene Hoevertsz responsabel pa e loke e ta wordo acusa di dje, Corte a mustra cu Utilities su ponencianan no ta corecto y como tal ta haya cu Hoevertsz tin derecho riba su compensacion conforme e areglo y palabracion haci. Check e sentencia AKI.