Joost Meijs ta bira e proximo CEO di aeropuerto Reina Beatrix

ORANJESTAD – E CEO nobo di Reina Beatrix International Airport ta conoci. Pa 1 september, e actual director di Eindhoven Aiport na Hulanda, Joost Meijs ta reemplaza James Faziio. Minister di Turismo y esun responsabel pa aeropuerto Dangui Oduber a confirma e informacion pa NoticiaCla. No ta conoci pa cuanto tempo Meijs su contract lo core. E ta un persona relativamente hoben, cu experiencia den construccion y renobacion di aeropeurto, ya cu el a pasa aden na Eindhoven recientemente. Fazio mientrastanto lo yuda ‘werk in’ e CEO nobo, manera e mes a confirma recientemente pa NoticiaCla. 

CAMBIO

Tabata recientemente cu Fazio a ‘sorprende’ cu e noticia cu e no ta keda un extencion mas y ta prefer bai Merca bek pa motibonan familiar. E mester a dicidi awor, pa wak si ta cuminsa cu e expansion y reconstruccion di e aeropuerto, y como tal a opta e ora cu esaki ta e miho momento pa e ‘laga cay’. Fazio a bin for di Merca unda cu el a traha tambe eynan pa Royal Schiphol Group na e aeropuerto Mericano, y despues a bin Aruba. Schiphol Group mes a caba extende nan presencia pa 5 aña mas y asina garantisa cu nan lo ta envolvi den e proyecto mas grandi di construccion na Aruba di ultimo añanan. E periodo ta di 5 aña, y e CEO nobo lo mester bay guia esaki proximamente. Potret cortesia Astrid Thuis/Hollandse Hoogte.