Bucuti y Tara Beach Resort a gana e prom ‘Climate Action Award’

EAGLE BEACH,  – Awe na Sevilla, Spaña, World Travel & Tourism Council (WTTC) (Conseho Mundial di Viahe y Turismo) a anuncia Bucuti & Tara Beach Resort di Aruba como e ganadó di e “Climate Action Award” (premio pa Accion na Bienestar di Clima) durante e ceremonia “Tourism for Tomorrow” (turismo pa mañan). E premiacionnan aki, cu ya caba ta den nan di 15 aña, a tuma lugar den un ceremonia special di e Cumbre Global di WTTC, pa celebra iniciativanan den turismo cu ta inspira y haci cambio na nivel mundial.

WTTC ta representa e sector priva global di Viahe y Turismo. E Cumbre Global ta e evento mundial mas importante di e sector tur aña. E reunion anual ta inclui hefenan di estado, CEOnan di diferente industrianan y profesionalnan di hospitalidad y turismo. E orador principal e aña aki tabata ex-presidente di Merca, Barack Obama.

Ganador di e prome “Tourism for Tomorrow Climate Award”

Bucuti & Tara Beach Resort ta e ganadó di e prome “Climate Action Award” cu ta wordo otorgá. Doño y CEO di e resort, Ewald Biemans a dirigí su mes durante e Cumbre na e publico prestigioso di lidernan gubernamental y ehecutivonan global. Mientras cu un di e enfokenan principal di e premio aki tabata Bucuti su añanan di iniciativanan pa cu sostenibilidad y pa a logra yega na “Carbon Neutrality/Net Zero” na augustus di 2018, Biemans a comprometé su mes durante su discurso di aceptacion cu “e viahe ambiental a caba di cuminsa, y nos lo sigui traha pa un mundo miho”.

Biemans a presenta “The Path to Carbon Neutrality/Net Zero” (e Caminda pa Neutralidad di Carbono)  dia 2 di april, dia di Turismo pa Mañan y cu tabata parti di e Cumbre Global di WTTC. E material presenta a comparti e vision, iniciativanan y resultadonan di yega na Net Zero. Cu accionnan comproba cu ta facil pa reproduci, Bucuti su enfoke ta pa mustra y curasha otronan pa haci mescos. Biemans a enfatisa cu “no tin excuus awendia pa hotelnan no traha den direccion di “carbon neutrality/net zero”.

Bisá cu bira “carbon neutral/net zero” ta imposibel

Dies aña pasá nan a bisa Biemans cu ta imposibel bira carbon neutral/net zero. Esaki a haci Biemans mas determina ainda pa logra e cos aki. El a dedica su mes na investiga y implementa un plan di iniciativanan pa ofrece un experiencia vacacional miho y mas saludabel na su huespednan. Como e hotel Caribeño cu mas certificacion ecologico, Bucuti a cuminsa shete aña pasá cu e parti mas intensivo di e proceso “carbon netral/net zero”.  Pa augustus 2018, e resort tabata e prome den Caribe pa logra e certificacion.

 “Tabata un biahe y e ta un cu ta sigui mientras nos ta continua e trabou pa combati cambio di clima y promove salud y bienestar di tur ser bibo”, Biemans ta bisa. “Mi tin un tremendo aprecio pa nos “Green Team” y e trabou cu nos a haci hunto desde cu Bucuti & Tara Beach Resort a habri”.

Aunke e huespednan disfrutando di e hospitalidad relaha y luhoso di e resort pa adulto so riba e santo blanco di Eagle Beach kisas no ta realisa e hecho aki, esaki ta e unico resort certifica “carbon neutral/net zero” di Caribe. Pa mas di 30 aña su doño ambientalita, Ewald Biemans, a traha pa proba cu sostenibilidad, satisfaccion di huespednan y rentabilidad por bai hunto.

Mientras cu e resort semper tabatin medio ambiente na pecho, e trayecto pa net zero a cuminsa djis shete aña pasá. En bes di confia riba compensacion den e area aki, Bucuti & Tara su “Green Team” a enfoca conscientemente riba maneranan pa reduci e emisionnan di carbon den su operacion diario. Desde 2016 e resort su 618 panelnan solar combina cu fuentenan solar y di biento ta produci 40 porciento di su necesidat di energia. Otro esfuersonan ta inclui instalacion di sistema di maneho di energia den e cambernan, douche y toilet cu fluho di awa hopi abou, y un sistema di laundry a base di ozon.

Kiko kier men ta un ganadó di premio WTTC Tourism For Tomorrow

E ganadónan di premio “WTTC Tourism For Tomorrow” di 2019 ta wordo altamento elogia y reconoci pa nan practicanan di negoshi cu ta cunpli cu e standardnan di mas halto y cu ta balansá e necesidatnan di “hende, planeta y rentabilidad” den e sector di Biahe y Turismo. E ganadónan di 2019 ta promove crecemento inclusivo y ta ilustra un compromiso fuerte pa sostene cambio y transformacion den practicanan di negoshi y comportacion di consumido pa yega na un sector cu ta mas consciente di medio ambiente.

E “Climate Action Award” ta reconoce accionnan innovativo sea pa medio di cambio di comportacion di huesped- y empleadonan, cambionan di enfoke, of introduccion di tecnologia pa reduci e escala y impacto di cambio di clima.

E Premionan ta na huisio di un panel di expertonan independiente, encabesa pa Prof. Graham Miller, Decano Ehecutivo y Profesor di Sostenibilidad den Negoshi di Universidad di Surrey. E panel a consisti di academiconan, lidernan empresarial, NGO y representantenan di diferente gobierno cu a reduci e lista di 183 cu a aplica, te na 15 finalista. E proceso den tres parti pa yega na e finalistanan a inclui un revision minucioso di tur e aplicacionnan, siguí pa evaluacion na sitio di cada finalista y su iniciativanan.

E ganadó den cada categoria a wordo determina door di  e Comite di Seleccion di Ganadornan di WTTC Tourism For Tomorrow, cu como presidente Fiona Jeffery OBE, Founder & Chairman, Just a Drop, y consistiendo di Wolfgang M. Neumann, Non-Executive Director and Strategic Advisory, Global Hospitality, Travel & Tourism Sector; John Spengler, Akira Yamaguchi Professor of Environmental Health and Human Habitation, Harvard T.H. Chan School of Public Health; y Louise Twining-Ward, Senior Private Sector Specialist, Global Tourism Team, World Bank.

Gloria Guevara, Presidente y CEO di WTTC a comenta: “E finalistanan di e premionan Tourism for Tomorrow di e aña aki ta muestra di e hopi maneranan cu nos industria ta dedica na crecemento sostenibel. Na 2018 e sector di Biahe y Turismo a contribui na 10.4% di GDP globalmente y a sostene 319 miyon cupo di trabou rond mundo. P’esei ta esencial pa nos sigui crece na e manera mas sostenibel y responsabel posibel. E categorianan nobo di premiacion pa e aña aki ta cuadra cu e prioridadnan strategico di WTTC y ta ilustra cu tur miembro di e industria aki ta hunga un papel clave den pusha e sector padilanti pa un futuro mas responsabel. Mi ta felicita nan tur cu nan logronan fantastico y nan liderazgo.”

Fiona Jeffery, OBE, Presidente di WTTC Tourism for Tomorrow, a bisa: “E meta di e premionan WTTC Tourism for Tomorrow ta pa mustra un par di e ehempelnan mas exepcional di practicanan di turismo sostenibel den mundo, pa inspira y curasha nos industria pa haci un impacto positivo tanto pa nos generacionnan presente como esunnan futuro. Den 15 aña nos a mira e industria tuma pasonan grandi pa alcansa e metanan aki y nos por mira cambionan positivo ta sosodiendo. Resultadonan di encuestanan receiente ta mustra cu 67% di biahero lo considera e agenda sostenible di un compania di biahe ora di reserva un biahe, mientras cu 48% di biahero awendia lo paga mas placa pa biaha den forma sostenibel. Mientras tin mas cos pa haci, nos mester probecha e impulso pa cambio pa proteha  producto cu ta sostene nos industria.

Jeff Rutledge, President y CEO, AIG Travel, Sponsor di e premionan, a indica: “Di iniciativanan di empleo socio-inclusivo pa establecimento di un di e prome proyectonan di restauracion di naturalesa na Filipinas, e finalistanan pa premio WTTC Tourism For Tomorrow a proba di ta un grupo increibelmente diverso di innovadornan di rond mundo. Nan a demostra cu, sin importa tamaño of proposito di e negoshi, tur e miembronan di e industria di Biahe y Turismo por permiti nan mes pa haci sostenibilidad un prioridad, y bira parti di nos marcha colectivo pa un futuro mas berde.

Pa mas informacion di e premionan Tourism For Tomorrow y tur e ganadónan, por fabor bishitá:

http://wttc.org/t4tawards