Minister Croes: Otro siman ta habri edificio di DIMAS/DAO atrobe

ORANJESTAD – E edificio di DAO/DIMAS ta planea pa wordo "geleverd" door di e compania Total Pure dia 12 di November awor. Minister encarga cu labor, Paul Croes a confirma esaki na NoticiaCla.com diamars mainta. “Despues di un limpiesa grondig y tambe algun ahuste nan ( cu un onder aannemer) na tuberia kibra (kizas sabotea) e lugar lo keda bon” e mandatario a sigui bisa. “ Despues di esaki nos ta spera cu servicionan di ambos departamento normalisa” Croes a finalisa bisando.

Manera ta conoci, pa varios siman e edificio a wordo ‘sera’ pa trabou por a tuma lugar atrobe den e edificio pa wak kico e problema tabata, y mesora soluciona esaki. Mientrastanto e trahadonan di tanto DIMAS como DAO a keda traslada pa otro edificionan pa nan por a continua cu nan trabou diario sin cu esaki ta wordo interumpi. Tur e tempo aki, a reparti e trabou den varios edificio existente y a manda un notificacion pa tur esnan envolvi y pendiente di informacion necesario, pa e trabou no mester a pega.

Segun e mandatario, ta spera cu awor cu trabounan ‘extra’ a tuma lugar, cu esaki lo mester alivia e problema pa semper, y no cu despues di algun tempo atrobe, mester bolbe sera e edificio manera a sosode den pasado recien. Potret ta di archivo ora cu e trahadonan a bay den accion.