Minister Bikker: No tin plan pa kita autonan right hand drive for di caminda

ORANJESTAD - Minister di Husticia mr. Andin Bikker no tin ningun plan pa kita autonan right hand drive for di caminda. Asina e mandatario a bisa diabierna pa medio di un comunicado.  Segun e mandatario, el a tuma nota cu cierto medio di comunicacion liga na oposishon lo kier crea confushon riba e tema. “ Pesey ta bon pa aclarea cu no tin ningun plan di parti di Gobierno di Aruba pa prohibi e tipo di autonan aki” Bikker ta bisa. Segun e mandatario, e derecho di tin propiedad ta ancra den nos Constitushon y Cortenan internacional a subraya e derecho aki pa cu autonan right hand drive varios biaha. “ Un auto right hand drive di Inglatera por ehempel ta safe pa core na Hulanda y den ful Union Europeo y no tin indicacion di estadistica cu aki lo ta diferente. Pues ta respeta e libertad di opinion personal di un y tur riba e tema, pero e minister en todo caso ta subraya cu no tin ningun plan pa prohibi e tipo di autonan aki” Bikker ta finalisa bisando den e comunicado.