Sneek: Manifestacion ta pa forza gobierno yama eleccion awor

ORANJESTAD – E manifestacion cu partido AVP a yama pa dia 12 di april, ta pa forza gobierno yama eleccion awor. Y cu awor, nan kier men e periodo  mas lihe segun ley ta stipula, cu ta 90 dia. Asina lider di fraccion di AVP Marlon Sneek a bisa durante e programa NoticiaCla LIVE diahuebs anochi. Si partido AVP no logra nan meta cu e manifestacion di dia 12 di april, lo continua cu mas den futuro cercano te ora cu nan logra, Sneek a sigui bisa. Loke ta pasa finalmente e diabierna ey, ta esnan cu ta manifestando tin cu dicidi. “Vox populi vox dei”, ta e lema. Nan lo dicidi” Sneek a bisa. Loke cu nan kier ta pa gobierno revoca of no introduci mas medida manera cu nan lo kier haci mitar di e aña aki, y fiha eleccion nobo. Ora cu a insisti pa un fecha, Sneek a bisa, “Dentro di 90 dia”, ya cu esaki ta loke cu ley ta stipula pa un elecccion. 

MANIFESTACION

Manera cu ta conoci, partido AVP ta organisando un manifestacion pa dia 12 di april, pa protesta contra e gobierno aki pa a e.o. comete ‘kiezersbedrog’. Pa AVP segun Sneek, esey ta ora cu  bo priminti hende algo den un campaña y no cumpli cune den bo periodo di gobernacion. E hecho cu pueblo por castiga e gobierno na mando den un proxim eleccion, no ta suficiente segun Sneek. E ta mustra cu ta awor mester baha e gobierno aki. E contesta ta riba e pregunta, pakico no ta warda ora pa e proximo eleccion, y si pueblo kier ‘straf’ e gobierno, por haci esaki durante un eleccion. 

DESPUES KICO

Kico lo pasa dia 12 di april, no ta conoci, y Sneek a mustra cu si no logra nan meta e dia ey, lo continua cu nan siguiente plan, cu por ta mas accion den futuro cercano, pero no kier a bay den detayes di nan plan di accion. Loke por compronde, ta cu esaki ta ‘e comienso’ di accion pa por logra forza gobierno actual yama eleccion nobo.