DTI: Di tur truck di cuminda na Aruba, solamente uno ta cumpli cu tur regla

ORANJESTAD - Di tur truck di cuminda na Aruba, solamente uno ta cumpli cu tur regla. Asina Dienst Techische Inspecties (DTI) a bisa diabierna den un comunicado. Nan no ta bisa si, cua ta e unico truck aki cu si ta cumpliendo cu tur regla, pa tur hende sa. DTI, den e luna januari/februari di 2019 a haci un analysis (“survey”) di e trucknan di cuminda (“Food trucks”) na Aruba y si nan ta cumpliendo cu DTI su requisitonan. E “food trucks” nan aki por ta mobiele aanhangwagens, stationaire aanhangwagens, mobiele truck, stationaire trucks, hasta container y lugarnan vast.

Mayoria di e lugarnan aki ta habri anochi y tambe no ta habri tur anochi den siman, nan localidad ta banda di e caminda publico y den barionan di Oranjestad, Noord (Palm Beach), Paradera, Santa Cruz, Savaneta (Pos Chiquito) y San Nicolaas.

DTI a inspectiona e lugar (“Food truck”of truck di cuminda) pa e sguinte puntonan:

•          Gas installatie keuring (instalacion di gas)

•          Electra installatie keuring (instalacion di coriente)

•          Voertuigkeuring (keurmento di vehiculo si ta un truck cu ta core riba caminda publico)

•          Condicion di e lugar pa traha, brandblusser y EHBO kit

E resultado di e analysis ta lo siguiente:

Aworaki solamento un (1) food truck tin tur punto na ordo.

50% di e “food truck” no tin un instalación di gas gekeurd

92% di e “food truck” no tin un instalación di coriente gekeurd 

75% di e “food truck” no tin un geldig voertuig keuring  haci (esey ta conta solamente pa esun cu ta core riba caminda publico). 

75 – 90% di e “food truck” tin puntonan cu mester drecha cu ta e seguridad di e lugar di traha, brandblussers of EHBO kit.

DTI a laga carta di control (controle brief) atrás y a papia cu tur e operador di “food truck”nan tocante e puntonan observa y cu mester di atención.

Aki tres luna DTI lo pasa bek na tur e “foodtruck”nan pa wak si tin mehoracion. Si e situation no drecha, DTI lo bai cambia e strategia y cuminsa actua mas severo.

Hopi importante aki ta cu DTI ta haci tur e controlnan pa cu e seguridad di e operador di e “food truck” y su clientela.  

Na final, DTI hunto cu e trahadornan y companianan ta purba pa haci Aruba cada biaha un tiki mas sigur.