Cuater proyecto nobo di aeropuerto presenta dialuna

ORANJESTAD – Cambia tire di un auto mientras cu e auto ta den pleno movecion, ta e forma con CEO nobo di Aruba Airport Authority NV (AAA) Aruba Airport Authority N.V. (AAA) a describi e trabounan cu mester a tuma lugar na aeropuerto ultimo tempo. Pero dialuna tabata asina leu cu por a inaugura 4 proyecto completa dialuna atardi, cu ta e“Bus gate B”, “General Aviation Ramp Extension”, “East Apron Extension” y “Airfield LED Lighting”. Prome cu un presentacion den e edificio di e General Terminal, sigui pa un recorido den bus di aeropuerto, esnan invita por a mira kico 46 miyon florin na inversion a resulta, unabes completa.

E “Bus Gate B” ta consisti di e construccion di aproximadamente 400m2 pa brinda extra lugar di asiento pa 180 pasahero cu lo ta hacienda uso di e remote standnan. E proyecto aki a inclui tambe e construccion di banjo adicional y un facilidad di cuminda y bebida. E proyecto a tuma 8 luna pa completa y percura pa un inversion di Afl. 1, 850,000.

Mas expansion a wordo haci na e “East Apron” di aeropuerto, creando posicionnan 23 y 24 pa parkeer. Pa un aña e trahadornan di construccion a traha duro pa traha 2 remote stand cu lo cai bou di categoria ”C” di avion pa ICAO, poniendo tambe AGNIS – PAPA, LED floodlights y pits di fuel hydrant. Como parti di e Fuel Hydrant System un “valve chamber” a wordo construi e fuel pitnan di apron cu e “fuel farm”. Inversion total den e proyecto East Apron Extension ta di Afl. 13,000,000. Cu e 2 standnan extra aki aeropuerto tin awo un total di 18 posicion pa parkeer.

Na e parti pazuid unda cu avionnan priva ta wordo atendi, un otro inversion di Afl. 22,650,000 a wordo haci pa haci un extension di e rampa di General Aviation. E proyecto aki a ensera e expansion di e apron di General Aviation cu 78%, aumentando e cantidad di lugar pa parkeer di 14 pa 25, a instala tambe lusnan LED pa e taxiway y floodlights pa e apron, e construccion di un Helipad, 2 salida nobo (F & E) y e construccion di un ditch habri cu un separador di oil y fuel pa filtra e awa di yobida prome cu e bai lama. E proyecto tabatin un duracion di 20 luna.

Como un lider regional den e industria di aeropuerto, AAA ta hopi orguyoso pa inaugural e sistema di lusnan LED pa e sistema riba e Airfield. E proyecto aki a ensera trabounan pa cambia e lusnan y tur waya pa tecnologia LED, edge lights pa taxiway y runway, tur borchi di aerodrome, e CCRnan y panel nan di control. E runway edge lights nobo a wordo poni na distancia di 50 meter enves di 60 meter pa cumpli cu e regulacionnan nobo di ICAO. E sistema di lusnan LED lo permiti aeropuerto spaar mas of menos 260,000 kwh pa aña. E proyecto aki a tuma 2 aña pa completa y a percura pa un inversion di Afl. 8,610,000.

“Cu e suma total di Afl. 46,110,000 inverti den e 4 proyectonan aki, nos ta sigur di mantene nos posicion lider den region. Haciendo uso di tecnologia nobo den proyectonan di expansion lo definitivamente yuda nos ta mas sostenibel mientras cu nos ta ofrece servicio mehora na nos aerolineanan partner y usuarionan di aeropuerto,” asina e CEO di AAA James Fazio a bisa orguyosamente. E potretnan ta ilustra momentonan di e inauguracion festivo cu a tuma lugar na e apron di General Aviation na aeropuerto.