Minister Maduro: Trust kantoornan cu a keha, a bruha dos cos den otro

ORANJESTAD – “E trustkantoornan a bruha dos cos den otro”. Asina Minister di Finanza Xiomara Maduro a reacciona pa NoticiaCla riba e critica di algun trust kantoor riba e ley cu Parlamento a trata awe. Awe mainta NoticiaCla a haya reaccion di e grupo aki indicando cu e ley cu Parlamento a trata awe mainta, ta perhudica Aruba. Maduro ta sigura e portal aki cu esey no ta e caso. De hecho, segun Maduro, e ley cu a pasa no ta riba AVV manera nan ta pone den nan (trustkantoor:red) carta. “ E ley cu ta trata Buki 2 cu ta atende cu AVV ta poni pa yega na mei na Parlamento” Maduro a bisa.

LEY DI AWE

E ora ta surgi e pregunta, kico a bay robez y cua ley a wordo pasa. Maduro a sigura e portal cu no tabatin ningun motibo pa confusion, pasobra si e trust kantoornan a scuch’e, el a splica e situacion bon prome cu e ley a pasa awe mainta. “ E ley di awe ta trata ley pa adresa regimen fiscal cu ta wordo considera dañino ya cu lo por wordo por usa e regimen nan aki pa evita of keda sin paga impuesto” Maduro a sigui bisa. Union Europeo a remarca 3 regimen na Aruba como tal y a pidi Aruba pa atende cu nan. “ Nos a logra trata 2, esta e regimen fiscal di San Nicolas y e patentbox di e IPC regime y a keda falta e transparante vennootschap. E ultimo aki a keda trata den e ley cu a pasa awe unanimamente den Parlamento” Maduro a sigui bisa. Pues e trust kantoornan por keda trankil, manera cu e portal aki por a compronde. 

E KEHO

Tabata awe mainta cu varios trust kantoor na Aruba a protesta contra e ley cu mester kita Aruba di lista preto. Varios compania di trust cu tin nan permiso di trust, a tuma nota di e tratamento di un cambio den e ley di belasting den Parlamento, di awe diahuebs, 04 di April 2019.

SORPENDI

“Nos ta sorprendi cu ta bai trata un ley cu ta toca e tema di entre otro e Arubaanse Vrijgestelde Vennootschap  (A.V.V.) y cu e sector financiero (atrobe) no a wordo consulta riba e tematica aki” e comunicado di e trustkantoornan a bisa. “ Locual nos ta desea di informa y ilustra Parlamento y Gobierno cu e cambio relámpago den e ley di belasting y cu efectividad retroactivo, lo tin consecuencia negativo pa Aruba” e comunicado ta sigui bisa.

TRANSPARENCIA

E sector financiero ta apoya tur esfuerzo di Gobierno pa baha Aruba for di e lista preto pero lo desea cu esaki ta socede riba un manera transparente y responsabel.

AUDIENCIA CU GOBIERNO

“Na mas cu un ocacion den pasado nos a solicita audencia cu nos gobernantenan pa por informa mas di e sector y e AVV y con Aruba ta cumpliendo reglanan internacional. Pa medio di esaki nos ta bolbe solicita un audencia cu su Excelencia Minister di Finansa y su Excelencia Minister di Justicia” e comunicado a finalisa bisando.

LISTA PRETO

Manera ta conoci, recientemente Aruba a haya su mes riba un lista preto, pasobra Aruba su leynan ‘ainda’ no ta proteha pa companianan usa nos isla como un paraiso fiscal. E ley mientrastanto a pasa diahuebs mainta, y awor varios companianan cu ta afecta pa esaki, a protesta contra dje. E companianan cu ta protesta ta e.o. C.T.F. (Aruba) N.V.,Euro Trust International N.V., Orangefield (Aruba) N.V., Intima Management N.V.