Douane: Diferente boto di placer ta riesga sali for di Venezuela pa Aruba

ORANJESTAD - Apesar cu e frontera entre Aruba y Venezuela ta cera a bin constata cu tin diferente embarcacionnan di placer ta riesga di sali for di Venezuela pa Aruba. Departamento di Aduana Aruba den nomber di “Commissie Grensopening Venezuela” den e forma aki ta informa tur persona cu tin pensa di of a cumpra un barco, yate of carga y opta pa core e riesgo di bin Aruba for di Venezuela mientras cu e frontera ta cera cu esakinan lo wordo manda bek Venezuela sin ningun excepcion.

FRONTERA TA SIGUI CERA

Departamento di Aduana Aruba y “Commissie Grensopening Venezuela” ta informa cu ta hopi importante pa tur persona corda y comprende cu e frontera entre Venezuela y Aruba ta sigui cera! Esaki ta significa tambe cu ningun barco, yate of carga (cumpra na Venezuela) por sali legalmente for di Venezuela cu destino Aruba of vice versa. Asina departamento di douane a informa diahuebs mainta.