Cuerpo di bombero a despedi di nan comandante interino John Kelly

ORANJESTAD - Hopi sereno, emocional y bunita tabata e ceremonia organisa pa Cuerpo di Bombero y Rescate Nacional Aruba, dialuna mainta pa brinda sosten na miembronan di famia y despedi di un colega stima, un miembro di e famia di Brandweer cu a bay sosega den forma inespera lagando un bashi hopi grandi atras. John Kelly tabata un persona crucial den Brandweer, un homber cu a traha cu dedicacion y profesionalismo, e tabata un keyplayer den Brandweer, un bon amigo cu den tur momento importante pa Brandweer semper tabata presente.

Comandante di Brandweer, Ing. Edward de Cuba a splica cu e perdida di John Kelly ta hopi grandi, pa su famia, pa su club RCA, pa su amistadnan y pa tur miembro di su famia di Brandweer. No por midi su dedicacion, su sacrificio y tur loke el a nifica pa e departamento, De Cuba a expresa. Pa su caracter, pa su amistad; “nos no lo djis haya su falta…John a laga un bashi den e dienst cu no por wordo yena mas,” el a añadi. “John a logra loke e tabata kier den su bida,” De Cuba a bisa hopi emociona, “Danki y te oro.”

David Roza,  Presidente di e sindicato di Brandweer (SINBA) a expresa cu John Kelly semper tabata un bon colega y e lo sinti hopi falta di e custumber, e combersacion tanten cu nan ta bebe koffie mainta hunto. Roza a bisa cu e ultimo intercambio cu John Kelly tabata apenas un siman pasa, riba dialuna, unda cu John Kelly a bis’e cu awo cu a logra e “aanpassing” pa Cuerpo di Bombero mester sigui traha riba otro detayenan pa cu e posicion  huridico di e coleganan.

Representando Minister di Husticia, Arthur Dowers, kende no ta na Aruba pa motibo di biahe di trabao, tabata mr. Eduard Vos, kende tambe a duna un discurso cortico. Vos a traha hunto cu John Kelly den e comision pa establece e “aanpassing” cu a wordo introduci apenas algun siman pasa. El a describi John Kelly como un persona cu ta papia poco, pero ta bisa hopi.

Eduard Vos a bisa cu el a traha di cerca cu John Kelly den reunionnan di “aanpassing” y dialuna pasa despues di un reunion nan a haci un afspraak pa un reunion pa repasa e leynan di Brandweer e siman aki. Diahuebs mainta ainda nan a confirma e reunion cu otro y pa diahuebs atardi Ministerio di Husticia a ricibi e tristo noticia cu John Kelly a fayece. Cu John Kelly sosega na paz.