Insel Air Aruba a haya permiso pa bula buelo directo pa Surnam dialuna

ORANJESTAD – Porfin Insel Air Aruba a haya luz berde di Surnam dialuna pa bula su buelo directo di Aruba pa Surnam. CEO di Insel Air Aruba Frederick Nuboer a confirma esaki dialuna anochi na NoticiaCla.com. Mesora, segun Nuboer, a prepara e prome buelo dialuna anochi mes, y ta continua cu dos buelo mas den siman. Tur esaki ta posibel awor cu Insel Air Aruba a ricibi e asina yama ‘PMB ‘ cu ta e aeropuerto Zanderij riba su Ops-Specs.

“Inmediatamente esaki a wordo manda pa Casas, cu ta e departamento di Safety di Aviacion Civil di Surnam, cu na su turno a otorga e asina yama Foreign Operators Approval” Nuboer a bisa NoticiaCla.com. Despues di esey, Luchtvaartdienst di Surnam a confirma cu desde dialuna, e compania aereo Insel Air Aruba tin e permiso pa ehecuta e buelo comercial pa Surnam. E buelonan ta wordo realisa cu e ekipo recien adkeri, esta e Fokker 70.

Tabata algun luna pasa cu Insel Air Aruba na momento di introduci su prome buelo director pa Surnam, a haya su mes den un situacion unda cu e no por a efectua e buelo aki mas, y a inicia un ‘impasse’ formal entre Aruba y Surnam. Esaki na dado momento a conduci na un menasa di Aruba pa para buelonan di Surinam Airways pa bula pa Aruba. E no a yega asina lew ya cu Surnam a mustra nan disponibilidad pa yuda y coopera pa Insel Air Aruba por a cuminsa e tramite pa efectua e buelonan aki. Dialuna anochi, porfin esaki a bira un realidad.