Wever: CITGO Aruba ta claim cu no tin fondo pa sigui opera

ORANJESTAD – E situacion di refineria CITGO a empeora mas ainda diamars. Asina prome minister di Aruba Evelyn Wever a bisa den forma di primicia durante e programa NoticiaCla LIVE riba Facebook. “Ora cu mi a bisabo cu e ta de malo en peor, aworakinan, de peor en peor” Wever a bisa. “Esaki ta un update as of awe” e mandatario a sigui bisa. Un reunion di ayera cu a tuma lugar entre Aruba y e representantenan a confirma na Wever, cu e final di e refineria ta hopi cerca. 

SITUACION

Segun Wever, PDVSA Holding a bisa cu nan no ta dispuesto pa coopera pa manda e placa pa Aruba pa por sigui cu e fase 2. A haci un ultimo intento dialuna, unda cu a reuni cu representantenan na Merca, gobierno di Aruba, refineria di Aruba, sin autoridad Mericano, y PDVSA holding, y eynan a bin dilanti hopi cla cu PDVSA no ta dispuesto pa coopera. “E tin nos hopi mas cerca di e punto cu e partner aki nos no kier mas” Wever a bisa. “Definitivamente cu no”. E problema ta cu ainda cu no por sali for di e contracto, pasobra CITGO ta argumenta cu ta ‘force majeur’. E ultimo sanccion Mericano, ta duna e force majeur mas forza. 

KICO TA PASA DESPUES

E pregunta haci ta kico ta pasa despues di 2020, ya cu no kier CITGO mas, y aki Wever a bisa cu e pueblo lo tin cu dicidi esaki, pa via di un consulta nacional. Wever no kier jame un referendum official cu votacion, pero un consulta pa wak kico e pueblo di Aruba kier. “Hopi di nos den nos curason ta biba e deseo pa tin un refineria cu ta cumpli, cu ta paga bon, cu ta funciona, cu ta opera normalmente, y preferable, un refineria cu no ta bay nunca mas” Wever a sigui bisa. Algo cu segun e, awendia ta un illusion si bo wak con e negoshinan aki ta bayendo. Wever a mustra tambe cu tin un coalicion y ta e otro dos partidonan tabata cla caba cu e refineria, pero ta MEP ta esun cu ta kere den e refineria. “Nos ta kere cu e por trece bienestar y empleo na un nivel cu nos hobenan por haya trabou tecnico” Wever a bisa. 

PEOR EN PEOR

Ora cu Wever a bisa cu e situacion ta di peor en peor, e kier men specificamente cu CITGO ta claim cu nan no tin fondo at all, ni pa sigui cu e operacion” Wever a bisa. Loke e kier men ta CITGO Aruba. Berdad cu Merca a duna nan e licensia general pa saca fondo, pero nan no kier usa esaki esta e 15 miyon dollar. Ni maske nan a haya ok di gobierno Mericano pa usa e fondo aki. “Nan a bisa prome cu nan (CITGO) tambe kier haya parti di e placa, y esey no mag. Nan mes kier keda cu e placa pasobra nan sa ki dia nan mes por haye bek. Pesey nos ta di peor en peor” Wever a bisa. “Nos ta hopi cerca di e final di e refineria” Wever a bisa. Asina mes, no por para e contract, pasobra ta keda enfoca force majeur, cu legalmente no por cumpli. Pues no ta ‘nan falta’ cu cos ta pega. 

TRAHADONAN 

“A anuncia na e trahadornan caba cu pa fin di e siman aki, talves ta bira menos, y ta bira menos y ta bira menos. E situacion ta hopi serio, lamentablemente” Wever a sigui bisa.